Tabakalera: prekarietate gunea

2018/10/08
Tabakalerako UBIK sorkuntza liburutegian 13 gazte ari dira lanean, goi-mailako ikasketekin eta bakoitza bere alorrean espezializatua. Hala ere, bizi duten errealitateak ez du hau islatzen. Erabateko prekarietatean daude lanean eta euren egoera jasangaitza da. Euren soldata ez da 1000 eurora ere iristen; azpikontratatutako langileak dira; igande eta jaiegunetan lan egitea tokatzen zaie inongo plusik kobratu gabe; oporrak hartzeko zailtasunak dauzkate; euren ordutegiak itogarriak dira, eta kontziliazioa ezinezko egiten zaie...

UBIK sorkuntza liburutegiko bitartekariak

Beste behin ere, prekarietate egoera hau instituzioek azpikontratatutako zerbitzuok pairatzen dugu. Tabakalera kudeatzen duen administrazio kontseilua Donostiako udalak, Gipuzkoako Foru Aldundiak eta Eusko Jaurlaritzak osatzen dute. Behin eta berriz saiatu gara beraiekin harremanetan jartzen egoerari irtenbide bat bilatu eta guretzat lan-baldintza duinak adosteko helburuarekin, baina ez dugu inongo erantzunik jaso. Hau horrela izanik, Tabakalerako Administrazio Kontseiluari publikoki eskatzen diogu gure prekarietate egoerarekin amaitzeko beharrezkoak diren gestioak egiteko, beraien esku dago eta.

Guk, liburutegian zerbitzua ematen dugun bitartekariok, argi daukagu egoera hau irauli beharra dagoela eta horretarako martxan jarri gara. Lan-baldintza duinak lortu eta egoera konpondu arte ez gara geldituko.

Hau horrela, hurrengo egunetan egoera aldatu ezean aurrera eramango ditugun ekintzen berri emango dugu.