Gestamp

Auzitegi Gorenak berretsi du Gestamp taldeko enpresen artean legez kanpoko langile lagapena izan zela

2024/02/02
Autoak bere egiten du ELAko delegatuaren EAEko Auzitegi Nagusiaren epaia, eta 40 langile ingururen lan egoera erregularizatu beharko du. Auto baten bidez, Auzitegi Gorenak atzera bota ditu Gestam Tooling Erandio GTE eta Gestamp Try Out Service GTO enpresek EAEko Auzitegi Nagusiaren epaiaren aurkako errekurtsoak. Horrela, autoak arrazoia ematen dio ELAko delegatuari, berretsiz Erandioko langileak legez kanpo laga zirela Gestam Try Out taldeari, eta amaiera ematen dio bide luzeegia izan duen prozesu judizialari.

Ondorioz, 40 langile ingururen lan egoera erregularizatu beharko du Gestampek, eta demanda jarri zuten langileek subrogazio eskubidea eta enpresa aldaketagatik jasandako soldata galerak berreskuratzeko aukera izango dute.

Alde batetik, GTE Erandioko udalerrian dagoen enpresa bat da, 150 bat langilerekin. 2017an sortu zen, Gestamp taldeak Sistemas Mecánicos Avanzados (lehengo Matrinor) enpresa erosi zuenean. Bestalde, Gestamp Try Out Gestamp Muskizen dago, eta 50 langile inguru ditu; horietako askok modu irregularrean ematen dituzte zerbitzuak Erandioko lantegian.

ELAk lanean jarraituko du Gestamp taldeko plantillek jasaten dituzten diskriminazioak ezabatzeko. Gogora dezagun 2021ean, Muskizko lantegia ere kondenatu zutela aldi baterako lan erregulazioa negoziatzeagatik, ELAren demanda bat dela medio, eta orduan ere baliogabetu zuen Auzitegi Gorenak.