ELAk salatu du Trapagaranen aldi baterako lan erregulazioa espedientea inposatu nahi dutela eta ez dagoela industria proiekturik

ELAk salatu duenez, Tubos Reunidosek aldi baterako lan erregulazio espedientea (ABLE) ezarri nahi du Trapagarango lantegian, erabaki hori justifikatzen ez duten ekoizpen eta antolaketa arrazoiak argudiatuta. Izan ere, 2023ko itxierako emaitza ekonomikoen zain (mozkin handiak aurreikusten dira), taldeak 54,5 milioiko irabazi garbia izan zuen 2023ko lehen seihilekoan, hau da, aurreko urteko aldi berean baino 52 milioi gehiago. Negozio zifra 333 milioira iritsi zen, aurreko urtean baino %36 gehiago. Azkenik, 2023an, Tubos Reunidosek %160ko errebalorizazioarekin itxi zuen burtsa, lehen postuan kokatzeraino. Gauzak horrela, ELAk, enpresa batzordean gehiengoa duen sindikatuak (ELA 6; CCOO 3, UGT 2; LAB 1; ESK 1), ziurtatu du taldeak bere etekinak maximizatu nahi dituela aldi baterako lan erregulazioa baliatuz, eta, horrela, langileen baldintzak ahuldu nahi dituela. Bide beretik, industria proiektu eza salatu du. Sindikatuak "onartezintzat" jo ditu aurkeztutako arrazoiak. Bereziki kezkagarria iruditzen zaio arrazoi horiek beste ABLE edo kaleratzeetarako erabili ditzaketelako.