ELAk Sestaoko ArcelorMittalen azpikontratatutako langileen prekaritatea, xantaiak eta kaleratzeak salatu ditu
ELAk salatu du Sestaoko Arcelor Mittaleko zuzendaritzak CCOO, UGT eta USOk estatuan sinatutako faktura elektrikoa eta Aldi Baterako Enplegu-Erregulazioko Espedientea (ABEE) baliatu nahi dituela behin-behineko 100 langile baino gehiago kaleratzeko eta gainerako langileei xantaia egiteko. Sestaoko lantegiak irabaziak izan baditu ere, enpresak produkzio-geldialdia iragarri du eta enpresa-batzordeari jakinarazi dio 40KT beste lantegi batzuetara desbideratu dituela. Sindikatuak ziurtatu duenez, ArcelorMittalek enpresa-batzordeari xantaia egiteko maniobra hutsa da hau, enpresa-batzordeak ez dituelako onartzen zuzendaritzak ezarri nahi dituen aldebakarreko neurriak, hala nola txanda- edo ekoizpen-aldaketak. Sindikatuak gogorarazi du azken urteetan lantegiak itxi dituztela; kontrataziorik eta inbertsiorik ez dela apenas egon; lan-baldintzak aldebakarrez inposatu dituztela...
Bide beretik, ELAk lan-erritmo altuak arbuiatzen ditu, baita langileen gaineko kontrola eta zapalkuntza ere. Gainera, ziurtatu du enpresak sistematikoki urratzen duela hitzarmenean hitzartutakoa. Era berean, ELAk deitoratu du enpresak mantentze-lanen antolaketa-eredu bat (ARMP) inposatu nahian jarraitzea, txandakako lankideen segurtasuna kolokan jartzen duena. Izan ere, langile gutxi dira, eta gainbegirale bakarra dago solairu eta sail guztietarako.
ELAko atal sindikalak adierazi du ez duela onartuko zuzendaritzak orain erantzukizuna langileen bizkar gainean uztea eta behargin guztiak batzordearen aurka jartzea. Horregatik, enplegu-galera kezkagarria eta lan-baldintzen prekarizazioa salatzen jarraituko duela baieztatu du.