Gueñesko bide-garbiketako eta lorezaintzako langileak Sodupen mobilizatu dira, sektore bereko beste langile batzuekin parekatzea ahalbidetuko dien soldata-igoeraren alde

2020/10/01
FCC eta GMSM enpresek 20 urte baino gehiagoz azpikontratatutako langileek bi hilabete baino gehiago daramatzate greban. ELAk enpresaren interesik eza eta Gueñesko (Bizkaia) udalaren jarrera salatu ditu. Izan ere, udalak, bere gobernu-taldea buru duela, langileen aldarrikapenaren aurka agertu da publikoki, eta langileen soldata-hobekuntzen aurrean enpresa pribatu baten onurak defendatzearen alde agertu da.

Uztailaren 7tik greba mugagabea egiten ari diren Gueñesko bide-garbiketako eta -lorezaintzako zerbitzuko langile azpikontratatuak Sodupeko (Bizkaia) kaleetan manifestazioa egin dute, besteak beste, beste udalerri batzuetako sektore bereko beste langile batzuekin parekatzea ahalbidetuko dien soldata-igoera aldarrikatzeko, 5 urtez KPIra iristen ez diren igoerekin eta 2018tik izoztutako soldata-taulekin egon ondoren.

Uztailaren 7an, langileek greba mugagabea hasi zuten, hitzarmena negoziatzen bi urte baino gehiago eman ostean. Gaur egun, zerbitzu horien kudeaketa lehiaketa publikoan dago, eta horrek zaildu egiten du egungo enpresarekin akordio batera iristea. Horregatik eskatu zioten udalari pleguen onarpena atzeratzeko, baina eskaerak ez zuen arrakastarik izan. Esleipen berriak 200.000 euroko urteko igoera aurreikusten du lizitazio-prezioan; beraz, ELAk uste du zerbitzua emango duen enpresak bere gain har dezakeela langileen aldarrikapena.