ELAk salatu egin du Tubacexen enplegua defenditzen dutenen aurka Ertzaintzak agertu duen jokabidea

2021/04/16
Tubacexeko langileek gaur Gasteizko Legebiltzarrean amaitu dute euren lanpostuen alde hasitako martxa. Parlamentu aurrean izan den elkarretaratzean berriro ertzainek gehiegizko indarra erabiliz langileak kolpatu egin dituzte. Jaurlaritza Tubacexeko lan gatazkari ordena publikoko arazo gisa ari da heltzen, eta enplegua mantentzeko langileen borroka kriminalizatu nahi du. Gasteizko gobernua lotsarik gabe enpresako zuzendaritzaren alde kokatu da, eta Ertzaintza baliatu du, are lantaldearen ordezkariak bileren aurretik miatzeraino.

Ertzaintzak gogoan gauza bakarra du, Tubacexeko zuzendaritzaren interesak zeintzea; ez da inola ere saiatu greba lanpostua kendu nahi dietela salatzen dutenen greba edo manifestazio eskubidea bermatzen. Esaterako, ez dira ikertzen enpresako zuzendaritzaren hertsapen saioak, banaka ari baita grebalariak deitzen oinarrizko eskubideari uko egin diezaioten. Tubacexeko lantaldeak bi aldetatik pairatzen du bortizkeria: batetik enpresarena, kaleratzeekin, eta bestetik Ertzaintzarena. Sailetik agindu politiko bat eman zaio, enpleguaren alde ari direnei eskarmentua ematea. Egoera honek biziki haserretzen gaitu, eta Ertzaintza aldendu egiten du zerbitzatu behar dituen herritarrengandik.

ELAk Erkoreka sailburuari galdegin dio lan gatazka honetan duen jokabidea erabat alda dezala. Halaber, entzun dezala behingoz sindikatu honek sarri egin dion eskaria, ertzainen prestakuntzan oinarrizko eskubideen inguruko gaiak sar daitezen, esaterako greba eskubidea; izan ere, Segurtasun sailak ukatu egin ditu eskari horiek behin eta berriz.

Eskariok aintzat hartzen ez baditu sailburuak agerian utziko du ez dela gauza herri honek behar duen polizia zuzentzeko, bere herriaren eta jendearen zerbitzura dagoen polizia.