Greba Arabako Esku-hartze Sozialean, ekainaren 17an eta 22an

2022/06/08
ELAk, CCOOk, LABek, ESK-k eta UGTk greba deitu dute ekainaren 17an eta 22an Arabako Esku-hartze Sozialean, AISA patronalak uko egin baitio langileen erosteko ahalmena bermatzeari. Sindikatuek Arabako Foru Aldundia, Gasteizko Udala eta Eusko Jaurlaritza ere interpelatu dituzte, pribatizatutako eta prekarizatutako funtsezko zerbitzuaren arduradun zuzenak direlako. Honako hauek daude langileen aldarrikapen nagusiak: KPIari lotutako soldata-igoera; 30 orduko lanaldi-murrizketa; kontziliazio-neurri egokiagoak; lizentzien hobekuntza; plusen arteko bateragarritasuna... 1.000 langile inguru dira, %75 baino gehiago emakumeak.

Langileek grebara joatea erabaki dute, urte eta erdiz lan-baldintzak hobetuko dituen eta sektoreko langile guztien erosteko ahalmena bermatuko duen hitzarmen kolektibo bat negoziatzen aritu ondoren. Sindikatuek salatu dute patronalak negoziazioa luzatzen duela erosteko ahalmena bermatzen ez duten neurri eskasak proposatuz. Horrela, KPIaren igoera %11,5era mugatu nahi du, baldin eta hitzarmenaren indarraldiko (2021-2024) KPIen batura handiagoa bada. Horrek dakar hitzarmen kolektiboan murrizketa eta sektorea ez dago prest hori onartzeko.

Langileek babesgabetasun-egoeran dauden adingabeak, familia kalteberak, indarkeria matxistaren biktima diren emakumeak, gizarte-bazterkeriako egoeran dauden pertsonak, osasun mentaleko arazoak edo adikzioak dituztenak artatzen dituzte. “Funtsezko zerbitzua gara. Gizarteko kolektibo ahulenei arreta ematen diegu, baina pribatizatutako gizarte-zerbitzuetan lan egiten dugu. Pandemia garaian jasotako txaloen ondoren, orain erakundeen utzikeriari aurre egin behar diogu” deitoratu dute. “Konfinamenduan erakundeek txalotzen eta eskertzen zuten gure lana. Hala ere, orain mehatxu egiten digute lizitazioak aurrera ez ateratzeko hitzarmen-sinadurarik gabe, gure lan-eskubideak murriztuko lituzkeen sinadura”, salatu dute.