Greba deitu dute maiatzaren 24an eta 25ean

ELAk, CCOOk, LABek eta ESK-k bi greba egun deitu dituzte, maiatzaren 24an eta 25ean, Bizkaiko Esku Hartze Sozialean, negoziazio mahaia blokeatuta dagoelako. Langileek urte eta erdi baino gehiago daramatzate hitzarmena berritu gabe. Guztira, 19 negoziazio mahai egin dira, baina Gizardatz eta Geroan patronalek jarraitzen dute lan baldintzak pobretu nahian eta laneko segurtasuna bermatzeko neurririk hartu gabe. Bizkaiko Foru Aldundiaren aurrean egindako elkarretaratzean, langileek premiazko neurriak eskatu dituzte, arreta eredua errotik aldatzeko, laneko segurtasuna bermatzeko eta lan baldintzak hobetzeko. Langileek arduradun publikoen -Bizkaiko Foru Aldundia, udalak eta Eusko Jaurlaritza- jarrera salatu dute. “Beren gizarte politiken onuren inguruan hitz egiten dute. Bitartean, ordea, sektoreko ehunka langile baztertzeko neurriak hartzen dituzte, eta, ondorioz, baita eguneroko lana egiten duten kolektibo guztiak baztertzeko ere; kolektibo horietan, zaintzaren beste eremu batzuetan bezala, emakumeak dira nagusi”.