Greba eguna Arabako erresidentzia pribatuetan, prekaritatearekin amaituko duen hitzarmen probintziala lortzeko

2021/02/17
ELAk, LABek, UGTk eta CCOOk ezarritako gutxieneko zerbitzuak salatu dituzte, eta gatazka desblokeatzeko eskatu diote Aldundiari. Gogorarazi dute Arabako erakundea egoitzetan gertatzen denaren erantzulea dela, horiek finantzatzen baititu.

Arabako zahar egoitza pribatuetako langileek greba egun berria izan dute, ELA, LAB, UGT eta CCOO sindikatuek deituta. Langileek salatu dute urtean 1.792 orduz lan egiten dutela, hilean 1.000 euro baino gutxiagoren truke, enpresek ez dituztela urteko egutegiak betetzen eta azken orduko txanda-aldaketak izaten dituztela. Batzuetan, txandak bikoiztu ere egiten dira, eta ez dira errespetatzen legez ezarritako atseden-ordutegiak. Prekarietate-egoera horrek egoitzetako erabiltzaileei eskaintzen zaien asistentzia-kalitatean ere eragin zuzena duela azpimarratu dute.

Kexu dira zahar egoitzetako erabiltzaileei hurbileko arretarik eta behar duten denbora ezin dietelako eskaini, horrek langileengan eragiten duen higadura fisiko, emozional eta psikologikoarekin, pandemiarekin larritu egin dena.

Gauzak horrela, ELAk, LABek, UGTk eta CCOOk enpresei eskatzen diete patronala osa dezatela hitzarmena negoziatu ahal izateko, eta Diputazioari dei egiten diote, egoitza pribatuak finantzatzen baititu, eta, beraz, egoitzen sektorean sortu den negozioaren arduraduna baita, "Batzuk aberastu egiten baitira langileak hilabete amaierara iristen ez diren bitartean eta egoiliarrak arretarik gabe geratzen diren bitartean".
Sindikatuen arabera, mobilizazioek ez dute etenik izango gatazkari irtenbidea aurkitu arte.