Greba uztailaren 18an lehen hitzarmen probintziala aldarrikatzeko

Uztailaren 18an ELA eta LAB sindikatuek greba deitu dute Arabako egoitza eta etxebizitza komunitarioen sektorean. 36. greba eguna da 2019an sektorerako lehen hitzarmen probintziala lortzeko borroka hasi zenetik. Greba-egun berri hau laugarren greba-eguna da aurtengo apirilean ELAk eta LABek negoziazioan dinamika berri bati ekin ziotenetik. Aurreko mahaian bi sindikatu horiek beren aldarrikapenak proposatu ondoren, ekainaren 28an egindako mahaian patronalaren txanda zen.

ELA eta LABentzako patronalak helarazitako proposamena argi eta garbi ez da nahikoa eta sektoreko langileak prekarietatean betikotzea bilatzen du. Besteak beste, 2028ra arteko hitzarmen bat proposatzen zaigu, aurreko urteak ahazten diren bitartean. 2026., 2027. eta 2028. urteetarako 30 orduko lanaldi-murrizketa baino ez da adierazten. Eta soldatari dagokionez, oraindik ez dago mahai gainean urteko 19600 euroen aldarrikapena.

Gauzak horrela, gure jarrera sektoreko baldintzak hobetzea ekarriko duen hitzarmen bat aldarrikatzen jarraitzea da. ELAk eta LABek prozesuan inplikatzeko exijitzen diegu patronalei eta administrazioei.

Horregatik guztiagatik, egoera honetan, eta patronalak eta administrazio publikoek akordio duinak lortzeko borondaterik ez dagoenez, ELAk eta LABek greba deituko dugu berriro. Hitzarmen duina eta kalitatezko zaintza aldarrikatzeko greba.