Irailak 28, greba Arabako erresidentzia pribatuetan

2022/09/22

ELAk eta LABek beste greba egun bat deitu dute Arabako erresidentzia pribatuetan irailaren 28rako. Egun horretan, manifestazioa egingo da goizeko 11:00etan Albertia Campus egoitzatik (Nieves Cano) abiatuta, Gasteizko erdigunean dauden egoitzetan barrena, Aldundira iritsi arte. Manifestazioa kontzentrazio batekin amaituko da. Patronalek urratsik egiten ez badute, sindikatuek iragarri dute mobilizazio eta greba egun gehiago deituko dituztela.

Negoziazioa blokeatuta dago 2021eko otsailetik. Orduan, ELAk eta LABek negoziazio mahaitik altxatzea erabaki zuten, patronalak uko egin ziolako plataformako edozein artikulu aldatzeari. Izan ere, patronalak eskaintzen du sektore prekarioeneko langileek 1.200 euro kobratzea 2026an, KPIaren % 16ko karga metatuarekin azken bi urte hauetan, eta 1.742 ordu lan eginez.

Blokeo horren ondoren, Aldundiak bilera batera deitu zituen bi aldeak (sindikatuak eta enpresak) uztailean, negoziazioaren egungo egoera azaltzeko. Bertan, enpresak konpromisoa hartu zuen lehenbailehen egiteko negoziazio berri baterako deialdia eta proposamen ekonomiko bat egiteko. Hala ere, sindikatuek oraindik ez dute ezer jaso. “Horrek erakusten du patronalak ez daukala negoziatzeko asmorik”.