%100eko jarraipena hirugarren greba egunean

ELAren arabera, gatazkaren jatorria langileek bizitza pertsonala eta lanekoa uztartzeko duten ezintasunetan dago. ELAk salatu du ez dagoela lan egutegi zehazturik, oporrak ez daudela aurreikusita, lanaldi eta ordutegien etengabeko aldaketak gertatzen direla, eta enpresak uko egiten diola beharrezko egokitzapen edo lanaldi murrizketak onartzeari.

ELAk azaldu du gai horiek arautzeko negoziazio prozesu bat abiatu zela, baina ez zela inolako akordiorik lortu enpresarekin. Egoera horrek lan baldintzen duintasunaren aldeko aldarrikapen zabalagoa ekarri du.

Testuinguru horretan, sindikatuak hitzarmen kolektibo propio baten negoziazioa eskatzen du, lan egutegia arautzeaz gain, gaur egun inolako hobekuntzarik gabe aplikatzen den metalaren hitzarmenarekiko hobekuntza sozial eta ekonomikoak jasoko dituena.

ELAk azpimarratu du gatazka honek erakusten duela inolako enpresa ez dela txikiegia antolatzeko eta lan baldintzak hobetzeko borrokatzeko, eta gogorarazi du lanaren duintzea ez dela soldatetara mugatzen, baizik eta kontziliazioa eta bizi kalitatea bezalako funtsezko alderdiak ere barne hartzen dituela.