Bi kaleratzeen aurka Durangaldean deitutako Bizkaibuseko grebak erabateko jarraipena izan du

2021/06/07
Durangaldeko Bizkaibuseko 140 zerbitzu baino gehiagotan eragina izan du eskualdean gaurko deituta zegoen greba egunak. Avanza enpresak kudeatzen ditu Bizkaibuseko zerbitzu horiek Durangaldean eta etengabeko murrizketak egitea eta bi langile kaleratzea leporatu dio 24 orduko lehen greba eguna deitzea erabaki duen enpresa batzordeak. Egunean zehar, mobilizazioak egin dira Lemoan, enpresaren aurrean, eta Bilbon, Bizkaiko Foru Aldundiak, autobus zerbitzuaren arduradunak, duen egoitzaren aurrean. Grebaren jarraipena % 100ekoa izan da.

Enpresa-batzordeak gogorarazi duenez, Avanza taldeak Arratiako, Durangoko eta Bilboko lineak kudeatzen dituen Bizkaibus zerbitzuaren ardura hartu zuenetik, enpresak murrizketak, baldintza-aldaketak eta doikuntzak egin ditu, zerbitzua okertuz. Gainera, egoera hori larriagotu egin da, bi langile kaleratu baitituzte. Gauzak horrela, ELAk murrizketak eta kaleratzeak bertan behera uzteko eskatu dio enpresari, eta, aldi berean, Bizkaiko Foru Aldundiari neurri egokiak hartzeko eta kaleratzeak ekiditeko deia egin dio. "Diru publikoarekin ari dira murrizketak egiten eta langileak kaleratzen, eta Aldundia da erantzule nagusia, zerbitzuaren arduraduna baita".

Halaber, langileen egoera gertutik ezagutu arren, Miguel Angel Gomez Viar Bizkaiko Garraio diputatuak gatazka konpontzeko borondaterik ez duela salatu du sindikatuak. Hala ere, greba-deialdiari esker, hainbat talde politikok Batzar Nagusietako enpresa-batzordea hartuko dute, sindikatuek hala eskatuta.