ELAk dei egin die Gipuzkoako erresidentzietako patronalei hurrengo bilerarako proposamen bat ekar dezaten

Gaur, apirilak 27, Gipuzkoako erresidentzietako negoziazio mahaia izan da. Bertan, ELAk patronalei adierazi die prest dagoela edukiak eguneratzeko eta beste proposamen bat egiteko negoziazioa zuzentzeko; baina, aldi berean, patronalei dei egin die hurrengo bileran, maiatzaren 9an, proposamen bat aurkezteko benetako negoziazio bati ekin ahal izateko. Sindikatuak adierazi duenez, Gipuzkoako egoitzetako negoziazio mahaia osatu zenetik bost urte baino gehiago igaro ondoren, eta lau urteko gatazkaren eta 257 eguneko grebaren ondoren, erresidentzietako egoera "larria eta jasanezina" da. Gogorarazi duenez, ELAk eta LABek mahai gainean jarri zuten azken proposamena 2020ko abenduan izan zen, baina ez zen mahaian eztabaidatu ere egin. Urte eta erdi geroago, sindikatuak berriro deitu ditu sektoreko patronalak mahaira, negoziazioa berriz martxan jartzeko borondatea azaltzeko. Era berean, Gipuzkoako Foru Aldundiari, zerbitzuaren azken arduradunari, bere erantzukizuna bere gain hartzeko eskatu dio.