ELAk ohartarazi du mobilizazioak areagotuko dituela hitzarmenean aurrerapausorik ez badago

ELAk mobilizazioak areagotuko ditu datozen aste eta hilabeteetan, Arabako Etxez Etxeko Laguntzaren III. Hitzarmenaren negoziazioan aurrerapausorik ez badago. Sindikatuak salatu du AESAD patronalak ez duela akordiorako borondaterik erakusten, eta sektoreko langileen lan eta soldata baldintzak hobetzeko eskatu du.

Negoziazio mahaia duela ia urtebete eratu zen, eta patronalak denbora hori guztia behar izan du lehen proposamena aurkezteko. Proposamen horretan, 2026rako % 0ko soldata igoera eta 2027rako % 2koa planteatzen dira; 2028rako eta 2029rako igoerak, berriz, zerbitzuaren esleipenaren mende geratuko lirateke.

ELAk lan baldintzak hobetuko dituen eta langileen erosteko ahalmena bermatuko duen hitzarmena aldarrikatzen du, eta Arabako erakundeen inplikaziorik eza salatu du. Halaber, zerbitzua kanpora ateratzeko politika kritikatzen du, sektore feminizatu honen prekarizazioa areagotzen duelako; izan ere, langileetako asko emakume arrazializatuak dira.

Negoziazioan aurrerapausorik ez dagoenez, lan baldintzak hobetzeko bidea mobilizazioa dela nabarmendu du ELAk, eta ohartarazi du datozen aste eta hilabeteetan protestak areagotu egingo direla, patronalak eta erakundeek sektorearen eskaerei erantzuten ez badiete.