Aspace

Erabateko jarraipena izan du Gipuzkoako eguneko zentroetako grebak

2024/04/11
Gipuzkoako Aspace eguneko zentroetako eta hezkuntza eta arreta goiztiarreko zentroetako langileek hirugarren greba eguna dute, ELAk eta CCOOk deituta. Jarraipena, aurrekoan bezala, ia erabatekoa izan da. Langileek, erosahalmenaren aldeko borrokan, manifestazioa egin dute Donostian. Sindikatuek adierazi dutenez, Aspacek eta Administrazioak jarrera aldatzen ez badute, mobilizazioekin jarraituko dute. Hurrengo greba maiatzaren 8an izango da.

Aspacek erabat blokeatuta dauka hitzarmenaren negoziazioa. Langileek Administrazio Publikoari eta Aspaceri eskatzen diete, erosahalmena bermatzeko soldata hobetzeaz gain, gainerako hobekuntzak ere berma ditzatela: lana eta bizitza bateratzeko aukera emango duten neurriak, hobekuntza sozialak eta enpresaren beraren antolaketa eta funtzionamendua hobetzea.

Guztira, 169 pertsona daude grebara deituta. Zehazki, Irungo Arrupenea eta Urdanibia zentroetan, Bergarako Orixondoan, Arrasateko Udalaitzen, Urretxun eta Donostiako Intxaurrondo eta Goienetxen. Beasaingo, Tolosako, Eskoriatzako Luis Ezeizako, Donostiako Santa Teresako, Eibarko Goienetxeko, Bergarako Ibaiondoko, Andoaingo La Salle-Berrozpeko, Eskoriatzako Luis Ezeizako eta Arrasateko Musakolako langileak ere deitu dituzte grebara.