Espetxe-sistemaz sinatutako lan akordioak Jaurlaritzak behin eta berriz aldarrikatu duen eredu aldaketa hipotekatzen du

2021/09/27
Gaur, irailak 27, espetxeetako langileek urriaren 1etik aurrera izango dituzten lan-baldintzei buruzko akordioa sinatu dute Lakuan. Akordioa gutxiengoan sinatu da eta ez ditu ELAk egindako eskaerak jasotzen. Hori dela eta, sindikatuak elkarretaratzea egin du Lakuaren aurrean, eta bertan salatu du Jaurlaritzak aurkeztutako akordiorako agiriak ez duela lortu Administrazio Autonomoaren ordezkaritza sektorialaren % 15en babesa ere. "Beste behin ere, Eusko Jaurlaritzak gutxiengoan sinatu du akordioa UGTrekin (estatuan ACAIPekin batera aurkezten dena), oinarrizko printzipio demokratikoak eta langile publikoek legitimoki aukeratutako gehiengoak errespetatu gabe", deitoratu du.

ELAren esanetan, Eusko Jaurlaritzak espetxe eredu propio, modernoago eta gizatiarrago baten aldeko apustua egin nahi duela behin eta berriz esan arren, akordioaren edukiak jarraipena ematen dio Estatuko ereduari, eta horrek bultzatzen duen eredu aldaketa hipotekatzen du.

Hala, azpimarratu du akordioak ez duela planteatzen LEP baten bidez plantilla handitzea. Gaur egun, langile gutxi daude, eta asko handitu behar dira eredua aldatu nahi bada; eta, era berean, ez da bermatzen eredu hori publikoa izango denik, pribatizazioari atea irekiz, are gehiago. Lan-baldintzei dagokienez, ez dira sartzen kolektiboak egindako aldarrikapenak; akordioak ez du barne hartzen edukiak dituen euskalduntze- eta berdintasun-plan bat abiaraztea, ezta kolektiboarentzako prestakuntza-plan egoki bat abiaraztea ere.

Gauzak horrela, ELAk argi du borrokan jarraituko duela Eusko Jaurlaritzak espetxe sistema propio baten alde egin dezan, iraganeko hipotekarik gabe, askatasunik gabeko pertsonen gizarteratzea lortzea helburu, eta hori kolektiboaren eskaerak kontuan hartuz bakarrik lortu ahal izango da.