Bizkaiko Esku Hartze Soziala

Free Tourra sektoreko enpresa nagusien aurrean, negoziazioetan izandako atzerapausoak salatzeko

2024/05/08
Bizkaiko Esku hartze sozialeko hamabigarren greba egunean, ELAk, %47ko ordezkaritzarekin, Free Tour bat antolatu du sektoreko erakunde nagusien aurrean (Elkarbanatuz, Lagun Artean, Gizakia, Etorkintza, Agintzari, Bizagarri...), patronalek negoziazioetan egindako atzerapausoak salatzeko. Sindikatuak salatu duenez, sektoreko patronalek eta enpresek hartutako erabakien ondorioz, langileek % 15etik gorako erosahalmena galdu dute. Konponbiderik eman beharrean, azken bileran, apirilaren 29an, patronalak erosahalmenaren galeran sakontzen jarraitzea proposatu zuen, kontziliazio gaiei heldu gabe eta zenbait zentrori babes berezirik aitortu gabe. Gauzak horrela, ELAk adierazi du negoziazioak langileen aldarrikapenei erantzuten ez badie, greba egun gehiago deituko dituela.

Erosahalmena galtzeaz gain, babes bereziko neurririk ez izateak arriskuan jartzen du langileen lan osasuna. Ibilbidean zehar hainbat bisita gidatu egin dituzte enpresa bakoitzean, "sektoreko bizi baldintzen prekarizazioari eskainitako monumentu" bakoitza ikusteko. Patronalez gain, ELAk zuzen interpelatu ditu instituzio publikoak, sektorearen prekarizazioaren "konplize" direla iritzita. Izan ere, funtsezko zerbitzu publiko bat azpikontratatzen ari dira, "langileen lan baldintzak prekarizatzearen kontura".

Sektore horretan, gaur egun, gizartearentzat funtsezkoak diren hainbat zerbitzu eskaintzen dira, hala nola adingabeentzako zerbitzuak, etxerik gabeko eta babesgabetasun egoeran dauden pertsonentzako arreta, emakumeentzako zerbitzuak (harrera etxebizitzak, gizarteratzea eta laneratzea...), zerbitzu soziokulturalak edo babesgabetasun egoeran dauden pertsonentzako arreta, besteak beste.