Gipuzkoako erresidentzietako langileek salatu dute Aldundiak akordio diskriminatzailea eta antidemokratikoa babestu duela

2022/09/26
Gipuzkoako erresidentzietako langileek, ELAk deituta, manifestazioa egin dute gaur Donostian. Mobilizazioaren bukaeran, Aldundiari leporatu diote gutxiengoan sinatutako akordio bat babestu izana. Izan ere, ordezkaritza sindikalaren %8k bakarrik sinatu du hitzarmena. “Aldundiak ez du errespetatu sektoreko langileen gehiengoaren borondatea. Helburu bakarra dauka: 260 greba egun baino gehiago daramatzaten langileak amore ematera bultzatzea”, salatu dute grebalariek.

Akordio horrek, ordea, diskriminazioko eta legez kanpoko artikuluak jasotzen zituen. Horregatik, ELAk inpugnatu zituen eta gero sinatzaileek (UGTk eta sektoreko hiru patronalek) kendu zituzten. Besteak beste, honako elementuak jasotzen zituen: atxikimendu pertsonalerako nahitaezko epea, grebarako eskubideari uko egitea eta 15 artikulu baino gehiago -Kontratazioa, lan osasuna, soldatarik ez aplikatzea, lan egutegia eta subrogazioa-.

Sektoreko ordezkariek gogorarazi dutenez, Gipuzkoako Foru Aldundiak ere eraginkortasun mugatuko akordio bat babestu zuen 2011n, antzeko baldintzetan. Orduan Auzitegi Gorenak antisindikaltzat jo zuen.

ELAko ordezkariek salatu dute Aldundiak sistematikoki uko egin diola sektorearen gehiengoa errespetatzeari eta elkarrizketa prozesu bat irekitzeari, eta hiru patronalen eta UGTren interesetara makurtu dela -sektorean gutxiengoa den sindikatua-. ELAk azpimarratu du sektoreko baldintzak hobetzeko borrokan jarraituko duela.