Gizarte Ekimeneko ikastetxetan urtarrilerako deitutako zortzi greba egunek babes zabala jaso dute langileen aldetik

2019/01/25
ELA, STEILAS, CCOO, LAB eta UGT sindikatuok mezu argia bidali nahi diegu bai patronalei, baita Eusko Jaurlaritzari ere: bakoitzak dagokion ardura eta erantzukizuna bere gain hartu dezala, eta gatazka honi irtenbidea emateko neurriak har ditzala, langileen aldarrikapenei taxuzko erantzunak emanez eta akordioetara iristea posible egingo duten planteamenduak eginez.

Gizarte Ekimeneko ikastetxetan 9.000 langile inguru daude, EAEko itundutako ikastetxeen %70 inguru dira eta 120.000 bat ikasleri ematen diote zerbitzua. Urtarrilak 16tik 25era bitarte deitutako zortzi greba egunek ere, azken bi ikasturtetan sektorean gauzatutako hamazazpiek bezalaxe, oso babes zabala izan dute langileen aldetik, %60-%65 bitarteko jarraipenarekin.

Zortzi greba egun hauen baitan gauzatu ditugun manifestazio eta ekintzetan milaka langilek hartu dute parte, eta gaurkoan ere, zortzi greba egun hauetako azken egunean, Gizarte Ekimeneko ikastetxetako milaka langilek bete dituzte Donostiako kaleak. Aldarrikapenek eta mobilizazio zein greba dinamikak langileen aldetik duten babesa agerikoa da, beraz.

Ikastetxe hauetako langileok hamar urte daramatzagu hitzarmena berritu gabe eta gure eskaerak ezagunak, oso oinarrizkoak eta zilegiak dira. Greba dinamika honetara iritsi aurretik ahalegin ugari egin ditugu patronalek aldarrikapen hauei erantzun eta akordioa erdieste posible izateko. Baina mobilizazio eta greba dinamika indartu dugunean soilik ikusi dugu patronalen aldetik mugimenduren bat. Halere, patronalek zortzi greba egun hauen aurretik egindako azken proposamenak gure aldarrikapenetatik oso urrun egoten jarraitzen du, eta gainera azken greba egun hauetan ez du inolako eduki gehigarririk planteatu.

Eusko Jaurlaritzak, berriz, bere ardura ekidin asmoz, greba eskubidea larriki urratzen duten zerbitzu minimoak gehitzera mugatu da, ondoren inolako zehaztapenik gabeko adierazpenak egin grebaren atzean dauden helburuei buruz inolako oinarririk ez duten zalantzak sortu, eta nahasmena sortu besterik egin ez duten adierazpenak eginez.

Patronalek eta Eusko Jaurlaritzak beren erantzukizunak eskatzen dien ardurarekin jokatuko ez balute eta eduki serioak dituzten proposamenik egin gabe jarraituko balute, mobilizazio eta greba dinamikarekin aurrera jarraitu beste biderik ez digute utziko.

Azkenik, sindikatuok langileak zoriondu nahi ditugu, beraien lan baldintzen eta eskaintzen duten hezkuntza kalitatearen alde egun hauetan erakutsi duten indar eta tinkotasunagatik.