Greba Arabako erresidentzietan martxoaren 30ean

2022/03/15

Negoziazio-mahaiaren blokeoaren aurrean -patronalak sektoreko lan-baldintza eskasak mantendu nahi ditu-, ELAk eta LABek ezinbestekotzat jo dute mobilizaziora jotzea. Horregatik, martxoaren 30ean greba-eguna deitu dute Araban sektoreko lehen hitzarmena lortzeko. Sindikatuek gogorarazi dutenez, mobilizazioen bitartez soilik lortu zen, lehen aldiz, egoitza eta etxebizitza komunitarioen negoziazio-mahaia eratzea.

Negoziazioak hasi zirenetik eta negoziazio-mahaia osatzeko hiru urte baino gehiagoko borrokaren ondoren, Arabako egoitzetako patronalak ez ditu lan baldintzak hobetu nahi. Sindikatuen esanetan, plataforma hori negoziazioa blokeatzeko erabiltzen ari da, ez baitie bermatzen lan-baldintza duinik Arabako egoitzen eta etxebizitza komunitarioen sektoreko langile guztiei, eta prekarizazioaren aldeko apustua egiten du, Bizkaikoa edo Gipuzkoakoa baino lan-baldintza kaskarragoak eskainiz.

Horrela, patronalaren helburua da hitzarmena amaitzen denean, 2026an, hileko soldata 1.220 eurokoa izatea (KPIaren inolako bermerik gabe) eta 1.742 orduko gehiegiezko lanaldiak ezartzea.

Sindikatuek, bestalde, kategoria guztietan %50eko igoera eskatu dute, KPIa (2022rako) eta sektoreko langile guztien erosteko ahalmena bermatuz, eta 2022rako 200 orduko jaitsiera.