Otsailaren 28an lanuzteak udal eta foru administrazioetan

2018/01/31
ELA eta LABek Udal eta Foru Administrazioko langile guztiei egin diete dei -30.000 langile inguruk egiten dute lan sektorean- otsailaren 28rako deitutako lanuzte eta mobilizazioetan parte hartzeko, "mobilizazioen bidez bakarrik lortuko baita egoerari buelta ematea". LAB eta ELA sindikatuok langileen ordezkaritzaren %80 inguru dugu Udal eta Foru Administrazioan.

ELA eta LABek ohar bateratua:

Pasa den abenduan iragarri genuen bezala, sektore honetan azken urteotan lanpostu asko galdu dira, egin diren kontratuak behin-behinekoak dira, zerbitzu asko pribatizatu dira hauen kalitatea eta langileen baldintzak nabarmenki okertu direlarik eta eroste ahalmen handia galdu dugu langileok. Horrela, EUDELek berak onartzen duenez, behin-behinekotasunak %36a gainditzen du, eta langileon eroste-ahalmena %10 baino gehiago murriztu da.

Pasa den abenduan bertan egin genituen mobilizazioak Elkargoko hiru Aldundien aurrean. Tamalez, gauzak ez dira aldatu. Alderdiek ez diete erantzunik eman gure aldarrikapenei, ez dute esan EUDELek duen jarrerarekin bat datozen edo kudeatzen dituzten erakundeetan Udalhitz hitzarmena betetzeko asmorik duten. Horrela, ulertu behar dugu isiltasun horrek adostasuna erakusten duela eta langileok berdin segituko dugula.

Egoera honen aurrean, eta abenduan aurreratu genuen bezala, mobilizazioekin jarraitzea erabaki dugu, horien maila igotzea ere. Hala, hurrengo otsailaren 28an lanuzteak eginen ditugu EAEko Udal eta Foru sektoreko erakunde guztietan. Hain zuzen ere, lau orduko lanuztea egingo dugu (11etatik 15ak arte, goizeko txandan; eta 15etatik 19ak arte, arratsaldekoan). Egun horretan bertan mobilizaioak eginen ditugu hiru hiriburuetan eta zenbait eskualdetako buruetan.

Aldarrikapenak, iragarri bezala, hurrengoak dira:

  • Zerbitzu publikoak garatu. Ematen ditugun zerbitzu publikoak defendatu eta garatu, pribatizazioak geldituz. Pribatizaturiko zerbitzuetan langileen lan baldintzak duindu eta klausula sozialak landu.
  • Enplegu Publikoaren alde: Suntsitutako enplegua berreskuratu eta behin-behinekotasun tasak %6ra jaitsi, akordioak betez. Lanpostuak egonkortu eta sortu. Eta betetzeko Langile batzordeen gehiengoarekin adostutako LEPak deitu.
  • Negoziazio kolektiboaren eskubidea berreskuratu: galdutako eskubideak eta eros- ahalmena berreskuratu.

Eta berauek lortzeko dei egin nahi diegu langile guztiei 28an lanuztean eta mobilizazioetan parte hartzeko, bakarrik mobilizazioen bidez lortuko baitugu egoerari buelta ematea.