Greba sektore publikoan
Sindikatuek epaitegietara jo dute Jaurlaritzak martxoaren 12rako ezarritako gutxieneko zerbitzuen aurka

Otsailaren 13an, ELA, LAB, CCOO, STEILAS eta ESK sindikatuek martxoaren 12ko greba iragarri zuten EAEko sektore publiko osoan. Erregistroa otsailaren 29an egin zen formalki. Eusko Jaurlaritzaren Lan Ordezkaritzak, ordea, ez du gutxieneko zerbitzuen agindua argitaratu eta jakinarazi martxoaren 8ra arte, hau da, sindikatuek greba deialdia argitaratu eta 8 egunera. Gainera, sindikatuekin bildu eta kontrastatu gabe egin dela deitoratu dute, eta gutxieneko zerbitzuak urriko eta abenduko greba egunetarako ezarritakoak baino handiagoak direla, argudio nahikorik azaldu gabe.
ELAk, LABek, CCOOk, STEILASek eta ESK-k adierazi dute ohiko praktika bihurtu dela Lan Ordezkaritzarentzat; izan ere, Lan Ordezkaritzak sistematikoki argitaratzen ditu gutxieneko zerbitzuen aginduak greba egunen bezperan, lehen sindikatu deitzaileekin eta administrazioekin egiten zen bilerari muzin eginez.
Sindikatuek salatu dutenez, Eusko Jaurlaritzak gero eta zerbitzu minimo handiagoak inposatzen ditu. Osakidetza edo Hezkuntza bezalako sektoreetan, adibidez, gutxieneko zerbitzuen ondorioz, langileen %100 lanera joan beharko dira, egunerokoan langile horiek bermatzen ez diren bitartean. Hezkuntza Publikoan, adibidez, Eusko Jaurlaritzak grebarako eskubiderik gabe utzi nahi ditu hezkuntza publikoko hezkuntza laguntzako espezialista guztiak.