ELA, STEILAS eta LABek maiatzerako utzi dituzte EAEko irakasleen greba eta mobilizazioak

2018/04/12
ELA, STEILAS eta LAB sindikatuok apirilak 23ko asterako hezkuntzan aurrikusita geneuzkan grebak atzeratuko ditugu. Erabaki hau hartu dugu apirilaren 18an mahai sektoriala dagoelako, hortaz, data horretara arte itxarotea erabaki dugu, mahai horretan Jaurlaritzak gure aldarrikapenak onartuko dituen edo ez jakiteko. Hori bai, apirilaren 18ko mahaian gure aldarrikapenei erantzungo dieten neurriak planteatu ezean, mobilizazio eta grebekin jarraitzea beste biderik ez digu utziko Jaurlaritzak maiatzera begira.

Sindikatuon agiria:

EAJk, PPek eta PSEk murrizketa politika gogorrak inposatu dituzte zerbitzu publikoetan azken hamarkadan, baita hezkuntza publikoan ere. Negoziazio kolektiborako eskubidea ere nabarmen urratu da. Ondorio zuzenenak honako hauek izan dira: plantilak murriztea; lan-kargak handitzea; hezkuntzako langileon prekarizazioa; ikastetxeetarako baliabide eskasia; azpiegituren kaskartzea; eta zerbitzu publikoen okertze eta pribatizazioa.

Bost greba egun genituen deituta Jaurlaritza bere jarrera immobilistatik ateratzeko asmoz eta mahai gainean proposamenen bat jartzera behartzeko.

Hezkuntza publikoko irakasleen inguruko proposamena abendukoa da, eta azken mahai negoziatzailea urtarrilaren 26koa izan zen. Hezkuntza Sailak abenduan egindako proposamenaren inguruko balorazio bilera bezala planteatu zuen mahai hura, sindikatuon proposamen haren inguruko balorazioa zein zen soberan jakin arren eta hurrengo hilabeteetarako mobilizazio egutegiaren berri izan arren. Arduragabekeria politiko gisa kalifikatu genuen sindikatuok Jaurlaritzaren jarrera hura.

Martxoaren 14 eta 15eko greba arrakastatsuen ondoren, Hezkuntza Sailak apirilaren 18rako deitu du Irakasleen Mahai sektoriala. Honek argi erakusten du beste behin ere Jaurlaritzaren negoziaziorako borondatea aurrean dituen mobilizazio eta greben araberakoa dela. Zentzu horretan, langileak zoriondu nahi ditugu mobilizazio eta grebei ematen ari diren erantzun eta babesarengatik. Deigarria eta salagarria da Jaurlaritzak deiturik dauden greben bezperara arte itxarotea negoziazio mahaiak deitzeko.

Sindikatuok argi eta garbi plazaratu izan ditugu zeintzuk diren kolektibo honi begirako gure aldarrikapen eta proposamenak:

  • Eusko Jaurlaritzak Hezkuntza Publikoan egiten duen inbertsioa nabarmen handitzea. EAEko hezkuntza inbertsio publikoa egungo BPGren %3,5etik gutxienez Europar Batasuneko batez bestekoa ezarriz eta progresiboki UNESCOk gutxienekotzat jotzen duen %6ra iritsiz.

  • Azken urteetan eman den matrikulazio igoerari, lan-kargen handitzeari eta ikastetxeen behar izanei aurre egiteko plantilak gutxienez 1.800 irakasletan handitzea.

  • Egun irakasle funtzionarioetan %38koa den behin-behinekotasuna %6ra murriztu, urteetan behin-behinean egon diren langileak egonkortuz.

  • Ikasle-ratioak %10 murriztea.

  • Soldata murrizketa eta %15 murriztu den eros-ahalmena berreskuratzea.

  • Gehienetan astebetera atzeratzen diren ordezkapenak lehen egunetik egitea kidego eta maila guztietan.

  • Bajak zigortzeari utzi eta lehen egunetik bere osotasunean ordaintzea.

  • Erretiroa errazteko eta laguntzeko neurriak berreskuratzea.

  • LOMCE Euskal Herriko gure ikastetxeetatik ateratzea eta honen moldaketa hutsa den Heziberri bertan behera uztea.

  • Hezkuntzaren merkantilizazioa alde batera uztea, egungo desorekak eta segregazio egoerak gaindituz hezkuntza garapen pertsonal eta sozial integralerako tresna izan dadin (kohesio soziala, integrazioa, aniztasuna, berdintasuna, hezkidetza oinarri).

  • Ikasle euskaldun eleaniztunak sortzeko euskarazko murgiltze eredua garatzea.

  • Balizko Hezkuntza legearen aurrean sindikatu, hezkuntza eragile eta herritarron parte hartzea eta iritzia aintzakotzat hartzea. Euskal Herritarrok erabaki behar dugu gure hezkuntza sistema gure errealitate eta beharren arabera, eta horretarako hezkuntza burujabetza ezinbestekoa dugu.