ELA-Ertzaintza eta azken atxilotzeko aginduak
Era berean, adierazi nahi dugu Barne-Ministeritzak atxiloketa hauek beharrezkoa ez zen dispositibo mediatiko baten bitartez egin zituela eta atxilotuen errugabetasun-presuntzioa urratu zutela. Atxilotutako pertsonak ezagunak dira eta euskal gizartean errotuak daude, ondorioz, ez zegoen ihes egiteko arrisku argirik eta epaitegian deklaratzera deituak izan zitezkeen. Baina, horren ordez, Barne-Ministeritzak ebazpen judizialen aurretik pertsona hauek erruduntzeko eta tentsio soziala sortzeko ekintza antolatu zuen.
Dispositibo honek salbuespen judizialeko denboretara garamatza, ertzainak mehatxatuak ziren eta atzean utzi nahi ditugun garaira. Bakea kontsolidatzeko garaia da eta hau alderdi, gizarte-eragile eta sindikatu guztion ardura da. ELA-Ertzaintzaren ustez argi dago atxiloketa hauek ez zirela egin adierazitako helburu horiek lortzeko.
Horrez gain, atzoko operazioan argi geratu zen bezala, Ertzaintzak Guardia Zibilarekiko duen menpekotasunarengatik gure haserrea adierazi nahi dugu. Ertzaintzaren izaera integrala aldarrikatzen dugu. Guri dagokigu ekintzak aztertzea, beharrezkoa balitz atestatua epaitegira bidaltzea eta, epaitegiaren aginduren bat izango balitz, berau betetzeko modua erabakitzea. Atzokoan, berriz, Ertzaintzak Guardia Zibilaren agindupean jarri behar izan zuen, arrasto politiko argia zuen antzeztoki batean. Horregatik, gertatutakoak Eusko Jaurlaritzaren eta Segurtasun Sailaren tamainako erantzun politiko eta instituzionala izatea exijitzen dugu.
Azkenik, Amalur Mendizabal senatariak jasandako zaurien aurrean, Segurtasun Sailari gertatutakoa argitzeko eta dagozkion erantzukizunak bila ditzala exijitzen diogu. Amalur Mendizabalek esandakoaren arabera bere senatari ardurarengatik bitartekaritza lanak egiten zebilen eta, ondorioz, Gipuzkoako gizartearen ordezkari politiko moduan. Ezinbestekoa da Ertzaintzaren ekintza guztietan indarraren proportziozko erabilera ematea. Era berean, Ertzaintzaren ekintza guztiak kontu-emate printzipiopean eman behar dira, horrela bakarrik lortuko baitugu gure eguneroko lanerako ezinbestekoa den zilegitasun soziala.