Areilzako anbulatorioaren langileek jasandako eraso onartezina Lehen Mailako Arretak bizi duen kolapsoaren ondorio zuzena da

2021/04/27
Apirilaren 26an Bilboko Areilza anbulatoriaren administrazioko langileek eraso bat jasan zuten erabiltzaile baten eskutik. Gertakari isolatutzat har badaiteke ere, Osakidetzan lehen arretak gaur egun duen ereduaren ondorio zuzena da. Lehen mailako arretaren jarduerak gora egin du azken urteotan. Hala ere, ez da baliabide egokirik jarri, eta horrek tentsionatu egin ditu bertan lan egiten duten pertsonen zereginak.

Gainera, Covid-19ko krisiak bete-betean eragin dio lehen mailako arretari. Hala ere, aldez aurretiko saturazioari gehitu zaio baliabide eta langile nahikorik ez dagoela, eta, beraz, sistema kolapso egoeran dago, eta zuzenean eragiten dio eman daitekeen arretari. Hori guztia dela eta, hainbat greba egun egin dira sektorean, Eusko Jaurlaritzak Euskal Osasun Publikoan eta, zehazki, lehen arretan dagoen inbertsio falta salatzeko. Inbertsio falta horren ondorioz, Bilboko Areilza anbulatorioko langileak bizi izandakoa bezalako egoerak aurki ditzakegu.

ELAk salatu egiten du atzokoa bezalako gertakariei, eta Eusko Jaurlaritzari, Osasun Sailari eta Osakidetzari exijitzen die behingoz serio har dezatela lehen arreta, baliabide material eta pertsonal egokiak emanez, asistentziaren kalitatea bermatzeko.