Osakidetzak beste urrats bat eman du pribatizazioan, hitzorduak kudeatzeko programa berria ezarrita

Ekainaren amaieran, Osakidetza Lehen Mailako Arretako osasun zentroetan Erantzunak izeneko programa ezartzen hasi da; Telefónica eta Ayesa enpresa pribatuekin lankidetzan garatutako sistema da. Osakidetzaren arabera, programa horren helburua da herritarrei telefono bidez ematen zaien arreta hobetzea, erantzun gabeko deiak saihestetako eta administrazio prozesuak arintzeko.

Aldiz, gero eta kezka handiagoa sortu du osasun arloko profesionalen eta erabiltzaileen artean. Prestakuntza ez baita nahikoa izan: osasun zentro askotan, langile bat edo bi baino ez zituzten bidali aurrez aurreko prestakuntza jasotzera (6 orduko saio bat) eta, ondoren, taldeko gainerako kideei irakasteko ardura hartu behar izan dute, denbora eta baliabide egokirik gabe (2 ordutan). Hori guztia, sistema martxan jarri eta bi aste eskasera. Gainera, Osakidetzako erakundeak ez du Erantzunak sistemaren funtzionamenduari buruzko ezagutza sakonik, eta horrek nahasmena, laguntza falta eta gainkarga ekarri die profesionalei.

Horri alderdi bereziki larri bat gehitu behar zaio: plantillan errefortzu falta erabatekoa da. Lehen Mailako Arretako lan karga oso handia da dagoeneko, eta sistema berri hori ezarri da, asistentzia eta administrazio presioa are gehiago handituz. Langileei eskatzen zaie eginkizun berriak hartzea, giza baliabide nahikorik gabe, eta horrek eragin zuzena du arretaren kalitatean eta profesionalen lan osasunean.

Arazo nagusietako bat da Erantzunak ez dagoela integratuta Osabiderekin, erabiltzen jarraitzen den programa klinikoarekin. Horrek zereginak bikoiztera behartzen du, eta horrek denbora gehiago eskatzen du, eta eguneroko kudeaketa zaildu. Ondorioz, dei gehiago galtzen dira. Egiaztatu da, halaber, dei bati erantzuteko behar den denbora nabarmen handitu dela aurreko sistemarekin alderatuta.

Akats horiek gorabehera, Osakidetzak Erantzunak programa are eta gehiago zabaltzea aurreikusten du, osasun zentroetan aurrez aurre eskatutako hitzorduen kudeaketa barne, eta ez soilik call centerretik telefonoz emandakoak.

ELAren ustez, aldaketa horrek atzerapauso bat dakar osasun arretaren kalitatean, enpresa logika lehenesten baitu sistema publikoaren benetako beharren gainetik. Programa hori berme nahikorik gabe eta langileen errendimendu efektiborik gabe ezarri da, eta pribatizaziorako eta zerbitzua deshumanizatzeko pausu bat gehiago baino ez da, osasun sistema publikoa eta langileen lan baldintzak eta herritarren jasotzen duten arreta okertzearekin batera.