ELAk langileen baldintzak premiaz negoziatzeko eskatu du

ELAk elkarretaratzea egin du ostegun honetan Osakidetzaren Gasteizko egoitzaren aurrean, Mahai Sektorialaren bilerarekin batera, Osasun Sailari eskatzeko berehala negoziatu ditzala euskal osasun publikoko langile guztien baldintzak.

Osakidetzaren lan baldintzak arautzen dituen akordioak 17 urte daramatza berritu gabe, eta ELAk kritikatu du gai hori mahai sektorialaren gai-zerrendan sartu gabe dagoela oraindik, nahiz eta lehentasunezkoa izan osasun publikoaren egiturazko arazoei aurre egiteko.

ELAk lan baldintzak hobetzeko borondate politikorik ez izatea leporatu dio Osasun Sailari, eta aurrerapenak eskatu ditu lanbide kategoria guztietarako. Bere ustez, kolektibo batzuk bakarrik hobetzeak ez du osasun sistemaren egoera konponduko, ezta herritarrei ematen zaien zerbitzuarena ere.

Gainera, gogorarazi du hainbat kolektibok hilabeteak daramatzatela mobilizatzen hainbat arrazoirengatik, hala nola behin-behinekotasunagatik, % 20tik gorako erosteko ahalmenaren galeragatik, lan-karga handiengatik, kontziliazio arazoengatik, euskalduntze neurririk ezagatik edo aitorpen profesionalik ezagatik. ELAk Osasun sailburuaren jarrera ere kritikatu du, "beste alde batera begiratzea" eta zuzenean Osakidetzaren menpe dauden gaietan Osasun Ministerioari erantzukizunak egoztea.

Bestalde, udan ospitaleetan eta osasun-zentroetan tenperatura altuen ondorioz dituzten arazoak aipatu ditu. ELAren arabera, egoera hori aspalditik errepikatzen da Osakidetzak konponbide eraginkorrik ezarri gabe, eta profesionalek eta pazienteek "osasunaren ikuspegitik onartezinak diren" tenperaturak jasaten dituzte.

ELAk deitoratu egin du arazo hori Mahai Sektorialaren bileran landu ez izana, eta lan eta artatze baldintza egokiak bermatzeko premiazko neurriak eskatu ditu.