Justiziak Osakidetzari eskatu dio ukatutako asanblada ahalbidetzea

Martxoaren 18an, Bilboko Administrazioarekiko Auzietako 3 zenbakiko Epaitegiak auto bat eman du, honako hau dioena: "Baietsi egiten da ELAk eskatutako kautelazko neurria in audita parte hartzea, hau da, OSAKIDETZAk, ESI URIBEk, asanbladarako eskubidea gauzatzeko baliabide egokiak ukatzeko betearazgarritasuna etetea, zehazki, asanblada informatiboa egiteko sala egokia ukatzea; eta 2025-03-19an ELAk Uribe ESIko langile guztientzat Urdulizko Ospitaleko ekitaldi-aretoan 14.00etatik 16.00etara deitutako asanblada egitea baimentzea".

Martxoaren 17an, ELA sindikatuak demanda bat jarri zuen Osakidetzaren aurka askatasun sindikalerako eskubidea urratzeagatik, Urdulizko Ospitalean asanblada informatiboa egiteko eskubidea ukatzeagatik. Batzarra martxoaren 19rako aurreikusita zegoen, eta ELAk kautelazko neurriak ere eskatu zituen, langileei informazioa emateko eskubidea baliatu ahal izateko. Batzarraren helburua langileei kontziliazioari buruzko eskubideen berri ematea da, lizentzia eta baimen horien inguruan arazo asko baitaude. Azkenaldian, zuzendaritza sistematikoki eta justifikaziorik gabe ukatzen ari da lanaldi-murrizketak, senideei laguntzeko baimenak eta abar.

ELAk Epaitegiaren ebazpena ospatu du. Gainera, Osakidetzari eta Uribe ESIko Zuzendaritzari jakinarazi die eskura dituen mekanismo guztiak erabiliko dituela bere eskubideak eta langileen eskubideak defendatzen jarraitzeko.