OSAKIDETZA

Medikuak falta dira Etengabeko Arretako Gune (EAG) askotan

2023/03/23
Osakidetzak jarraitzen du murrizketak eta prekarizazio politikak aplikatzen asistentzia maila guztietan, eta bereziki Lehen Mailako Arretan, besteak beste, Deustuko, Zumarragako, San Martingo, Lekeitioko, Bermeoko eta Zornotzako Etengabeko Arreta Guneetan. Bermeo, Lekeitio eta Zornotzako EAGek, besteak beste, medikurik gabeko osasun arreta eskaini behar izan dute.

Horrek ondorio larriak ditu lan baldintzetan, baita eskaintzen den zerbitzuan ere. ELAk berretsi du plan bat dagoela Lehen Mailako Arreta eta, batez ere, EAGak desegiteko, eta horrek berekin dakarrela lan baldintzak prekarizatzea –langilerik ez dagoenez, pazienteak beste baliabide batzuetara bideratzen dira, gehiegi kargatuz–, eta osasungintza hondatzea.

Murrizketek ondorio larriak dituzte. Amorebietako EAGn, adibidez, paziente baten bizitza arrisku larrian jarri zen. Erizaintzak, kategoria medikoari dagozkion funtzioak betez eta beste toki batean zegoen mediku batekin koordinatuta, paziente baten bizitza salbatu ahal izan zuen.

Ez da gertakari isolatu bat. Langileek eta Barrualde-Galdakao ESIko biztanleek aspalditik pairatzen dituzte erabaki horien ondorioak. 2022ko udan EAG batzuk fakultatiboaren kategoriarekin betetzeko arazoak izan bazituen ere, orain arazo bera daukate Bermeo, Lekeitio eta Zornotzako EAGetan. 2021ean, Mendexa eta Amoroto udalerri mugakideak pertsonal medikorik gabe geratu ziren, eta udalerri horietako pazienteek Lekeitioko Osasun Zentroan hartu dituzte beren gain.

Profesionalak egon badaude, eta lanerako prest daudela, baina ez eskaintzen zaizkien baldintza prekarioetan. Baldintza txar horiekin normala da profesional askok beste bide batzuk bilatzea, hala nola atzerrian lan egitea edo osasun pribatura jotzea.

Egoera hobeto ulertzeko hainbat datu:

  • Elkargoaren Erakunde Medikoaren arabera, 2021ean inoiz baino egokitasun ziurtagiri gehiago luzatu ziren atzerrian lan egiteko, guztira, 4.130. Eskaera gehien izan zituen espezialitatea etxeko medikua izan zen.
  • Gainera, 2012tik, Osakidetzako medikuen kopurua %10 igo da, eta osasun pribatuan, berriz, %69.