Osakidetzak Portugalete eta Santurtziko eskola-osasun zerbitzua itxi du

2014/06/13

Zerbitzu eta lan-baldintzen murrizketa politikaren ondorioz, Castaños Osasun Zentruan ematen zen Eskola Osasun zerbitzua ixtea erabaki du Osakidetzak. Zerbitzu hau Portugalete eta Santurtziko herrietara bideraturik zegoen. ELAk berriz ere zerbitzua irekitzea eta 4 behin-behineko lanpostu ez suntsitzea exijitzen du.

Eskola Osasun zerbitzu honek bi helburu zeuzkan. Batetik, hitzaldi bitartez eskoletan osasunaren zaintza bultzatzea. Eta, bestetik, eskoletako ikasleen txertatze eta osasunaren kontrola burutzea.

Osakidetzak txertatze eta errebisio zerbitzua osasun zentruetatik egitea erabaki du eta hezkuntza lana galtzea erabaki du. Hezkuntza lan hori astero ordubeteko kontsulta baten bitartez ordezkatu dute. Zerbitzu hau oso modu prekarioan emango da eta egungo beste langileen lan-kargak handituko dituzte.

ELAk oinarrizko zerbitzu hori berriz ere irekitzea exijitzen du. Gure ustez Hezkuntza lan on baten bitartez ohitura osasuntsuagoak bultza daitezke eta horrek gastua aurreztea ekar dezake epe ertainean, bizitza kalitatea hobetzeaz gain.

Bestalde, onartezina iruditzen zaigu Osakidetzak beste 4 behin-behineko lanpostu suntsitzea. Horregatik, berriz ere gizarteari eta langileei dei egiten diegu ekainak 26an Bilbon burutuko den manifestazio bateratuan parte hartzen.