Lan baldintzak salatzeko elkarretaratzea

Langileek Udalari eskatzen diote egonkortze prozesu guztiak berehala amaitzeko, horrela lan egonkortasuna lortu ahal izateko. Era berean, Lanpostuen Balorazioa behin betiko onartzea eta aplikatzea eskatzen dute. Balorazio hori 2023ko apirilean onartu zen hasieran, eta, ordutik, gordeta dago.

Premia berarekin, hainbat arrazoirengatik libre dauden Udaleko lanpostu guztiak berehala betetzea ere eskatzen dute: lanpostu hutsak, laneko bajak, erretiroak... Lanpostu horietako batzuk hutsik daude 2024tik edo lehenago ere: ofizial iturgina, ofizial udaltzainburua, alkatetzako administraria, hiri mantentze lanetako ofiziala, garbiketa burua...

Plantillak eskatzen du hautaketa prozesua izendapenekin amaitzea, eta, horrela, langile gabezia handiak dituen brigada bat egonkortzea.

Testuinguru horretan, ELAk eta LABek osatutako Langileen Batzordeak langile guztien osasuna bermatzeko eta haien eskubideak errespetatzeko eskatu du. Helburu horiek lortzeko, ezinbestekoa da adierazitako aldarrikapenak berehala betetzea.

Langileen Batzordeak uste du Laudioko Udalaren egoera kritikoak, langileen osasunari eragiteaz gain, herritarrei ere eragiten diela, ezin baita kalitatezko zerbitzu egokirik eman.