Langileek itxialdia egin dute enpresaren instalazioetan

Irailaren 30ean Gasteizko merkataritza arloko epaitegiak jakinarazi zuen ERErako kontsulta aldia ireki zela, Autoglas/Glavistako plantilla osoa kaleratzeko. Neurri hori hainbat faktoreren ondorioa da, baina nabarmentzekoa da Guardian multinazional amerikarraren (2020tik Glavistarena dena) itxiera erabaki programatua eta telegidatua izan dela, Parter Capital putre funtsa horretarako erabiliz. Guardianek uko egin dio gaur industria proiektu berri bat bermatzeko Autoglas dagoen lurrak eta instalazioak eskura jartzeari.

Horregatik, Glavistako zenbait langilek, plantillak eguerdian egin duen protesta kontzentrazioa aprobetxatuz, enpresaren instalazioetan sartzea erabaki dute, eta protesta itxialdia egiten ari dira; Guardianen jabetzako lursail horiek industria-proiekturako eta 200 lanpostu baino gehiago salbatzeko giltza direla adierazi dute.

Aste honetan langileek mobilizazioekin jarraituko dute. Ostegun eta ostiralean 12:00etatik 14:00etara elkarretaratzeak egingo dira enpresaren aurrean. Horretaz gain, aurreikusten da Aiaraldeko enpresa komite batzuk eta eskualdeko gizarte mugimenduak instalazioetara hurbilduko direla babesa ematera, langile taldea itxialdia egiten ari den bitartean.

Bestalde, urriaren 6an enpresa batzordeak manifestazio bat deitu du Laudion, 18:00etatik aurrera, Glavistaren lanpostu guztiak eta etorkizuna defendatzeko. Manifestazioaren irteera Glavistako instalazioetatik egingo da eta Laudioko kaleetan zehar eramango da.