Bigarren greba egunak ekoizpena geldiarazi du

Ormazabal Distribución Primariako (Ormazabal Taldea) bigarren greba egunak guztiz gelditu du ekoizpena, ELAren arabera. Zornotzako Boroa industrialdean dagoen enpresako langileek modu masiboan babestu dute mobilizazioa, enpresako lehen hitzarmena lortzeko negoziazioaren baitan.

200 langile inguruk soldatetan hobekuntzak, lanaldia murriztu eta hobeto antolatzea, lana eta bizitza pertsonala uztartzeko neurriak eta azken hilabeteetan ezarritako antolaketa aldaketen arauketa argia eskatzen dituzte.

Greba ekainean hasitako mobilizazioen jarraipena da. Lehenik bi orduko lanuzteak egin zituzten goizeko eta arratsaldeko txandetan, eta ondoren lehen greba egun osoa. ELAren esanetan, bigarren greba egunean ere izandako jarraipen zabalak erakusten du langileak batuta daudela eta hitzarmen duin baten alde egiteko prest daudela.

Sindikatuaren ustez, Ormazabal Taldeak azken urteotan izan duen hazkundeak langileen lan baldintzetan isla izan behar du. Horregatik, enpresari eskatu dio hazkundea langileekin partekatzeko eta antolaketan dauden aldaketak modu adostuan negoziatzeko.

ELAk zuzendaritzari eskatu dio orain arte egindako proposamenak alde batera utzi eta negoziazioa aurrera eramango duten benetako neurriak aurkezteko. Bien bitartean, grebak bihar eta etzi ere jarraituko du, langileen aldarrikapenei erantzungo dien lehen enpresa hitzarmena lortu arte.