Albisteak

Urtarrilaren 28an eratu da Gipuzkoako Paperaren sektoreko hitzarmenaren negoziazio-mahaia. ELAk ia % 49ko ordezkaritza du; LABek, 26,53koa; eta CCOOk, % 24,48koa. ELAk aurreratu du sektoreko langileen aldarrikapenak jasoko dituen hitzarmen baten alde borrokatuko duela, eta gainerako sindikatuekin batera egitearen alde dagoela, indartsuagoak izateko.

ELA pozik agertu da gaur, urtarrilak 27, 2022rako Gipuzkoako Metalean %6,5eko soldata igoera sinatu delako, 2020an adostu zen bezala.

ELAk jarritako demanda bati esker, Haizea Windek (Zierbena) ezin izango du probintzia hitzarmenak jasotzen duena baino lanaldi luzeagorik aplikatu. Bilboko Lan Arloko 6 zenbakiko Epaitegiak arrazoia eman dio ELAri eta baliogabetu egingo du zuzendaritzak, Euskadiko CCOOk eta UGTk 2021-2023rako sinatutako enpresa-hitzarmena; izan ere, hitzarmen horrek Metalaren Hitzarmen Probintziala baino askoz lanaldi luzeagoa ezartzen zuen, zehazki, 58 ordu baino gehiago lanaldi zatituarekiko, eta 100 ordu lanaldi jarraituarekiko.

Urtarrilaren 25ean Bizkaiko metalaren negoziazioan inputatutako hainbat langilek deklaratu dute Bizkaiko Probintzia Auzitegian. ELAk bat egin du protesta-elkarretaratzearekin; greba egitea edo manifestazio batean parte hartzea ezin da delitu izan.

Zamudioko DHL Suplly Chain enpresako langileek greba mugagabea hasi dute urtarrilaren 25ean. 20 langile ditu lantokiak, eta Euskaltelen zerbitzu logistikoa eskaintzen dihardu. DHLk duela gutxi jakinarazi zien langileei Euskaltelek zerbitzu logistikorako lotzen duen kontratua bertan behera uztea erabaki duela, eta bere asmoa deslokalizatzea eta zerbitzua Guadalajarara eramatea da. Horrek Zamudioko langile guztien enplegua suntsitzea ekarriko luke.

ELAk deitutako 10 eguneko greba-txanda hasi bezperan, akordioa lortu da Zamudioko ZTEko zuzendaritzarekin. Enpresa itunak soldata-igoerak, lanaldi-murrizketa, aplikatu beharreko gutxieneko soldatak eta telelanaren oinarriak jasotzen ditu. Gauzak horrela, grebak bertan behera geratu dira. ZTE Euskaltelen azpikontrata nagusia da.

Sidenor Basauriko ELAren atal sindikalak ez du onartu La Senda de Ugarte, UGT, USO eta CCOO sindikatuek sinatutako aurreakordioa, nahikoa ez dela iritzita. Atal sindikalak bere nahigabea adierazi nahi du La Senda de Ugarteren sinaduragatik. UGT, USO eta CCOOren sinadura ez da harritzekoa, beste esparru baten alde egiten baitute, plantillak partaidetzarik ez duen eta akordioak enpresak nahi dituenak diren esparru baten alde hain zuzen.

Urtarrilaren 20an, Altan Bernedoko langileek elkarretaratzea egin dute Arraia-Maeztu, Kanpezu eta Bernedoko udaletxeen aurrean; langile hauek greban daude azarotik. Helburua da Arabako Mendialdeko Koadrilak enpleguari eustea eta enplegu horrek baldintza duinak izatea. Altan Bernedo (Biomendi) inguruko enpresarik garrantzitsuena da.

Gasteizko Lan arloko 3. Auzitegiak epai irmoa eman du DHLren aurka; ELAk irabazitako epai baten mendeku gisa, bere afiliatuak ezinbesteko enplegu erregulazio espedientean (ABEE) bidegabi sartzeagatik zigortu du Mercedesen hornitzaile parkeko enpresa hori. ABEEa aplikatzeko modua ez zen zuzena izan, eta ELAren bidez salaketa jarri zuten 113 afiliatuek ordaindu ez zitzaien ordainsaria jaso beharko dute, gehi %10 atzerapenagatik. Langile bakoitzak batez beste 500 eurotik gora jasoko ditu (guztira ia 60.000 euro), eta ez dute galduko astebeteko langabezi saria.

ELAk errefusatu egin du Nordex Blades Lumbierrek Akabera eta Palen Ebaketa atalak kanpora ateratzeko aukera, eta enpresa batzordeak prentsan agertutako zenbait informazioren bidez jakin du horren berri. Erabaki horrek plantillaren prekarizazioa larriagotzea ekarriko luke (egungo behin-behinekotasun-kuotak %50etik gorakoa da). Lantegia Irunberrin dago, eta ELAko 3 ordezkarik, CCOOko 4k, UGTko 3k eta LABeko 2k osatutako batzordea du. Gaur egun ERTEn dago, pala-eredua aldatzeagatik, eta kontratu finkoak baino ez ditu mantentzen, 290 inguru, baina abendura arte, gainera, aldi baterako 340 kontratu inguru zeuden, eta ehuneko hori mantendu egin da azken urteotan.

ELA, LAB eta UGTk osatutako enpresa batzordeak salatu du urteetan FIASAko langile batek pairatu duen abusua eta jazarpena. Langraitzen kokatutako lantokia da, eta 300 langiletik gora ditu. Bertako goi arduradun batek jazarri du lankide bat, eta langileak egoera salatu arren, enpresak ez du inolako neurririk hartu abusatzailearen aurka.

Erandioko GTO Gestamp Try Out lantegiko langileek elkarretaratzea egin dute Bilboko epaitegien aurrean, enpresan aplikatzen ari den aldi baterako lan erregulazioko espedientearen aurkako epaiketa dela eta.

ELAk eta BUBk kontzentrazioak deitu dituzte Bridgestoneren (Basauri) aurrean urtarrilaren 19, 20 eta 25ean (fabrikako zubian, 13:00etatik 15:00etara), enplegua prekarizatuko duen azpikontratazio berri bat salatzeko. Salatu dutenez, milioi askoko irabaziak izan arren, Bridgestonek zereginak azpikontratatzen jarraitzen du. Batzordeko gehiengo sindikalak (CCOO, UGT) edozein ekintza sindikal egiteari uko egin badio ere, ELAk eta BUBk beharrezkotzat jotzen dute aldarrikatzea eta salatzea. “Onartezina da Basauriko instalazioaren etorkizuna, printzipioz oparoa, enplegua kanpora ateraz eta prekarizatuz eraikitzea”.

Gaur argitaratu da UGT, CCOO eta sektoreko enpresaburuen elkarteek metalaren industrian elkarrizketa sozialerako mahai iraunkorra eratzeko akordioa. ELAren ustez, lortu nahi den helburua enpresetan eredu klientelarra finkatzea da, UGTren eta CCOOren mesederako, bake sozialaren truke. Sinatzaileen propaganda-ariketa da, eta UGTk eta CCOOk metaleko langileen babesaren galerari aurre egiteko protagonismoa eta garrantzia lortu nahi dute, gero eta ordezkaritza txikiagoa baitute.

Arabako patronalak ez dio erantzunik eman ELAk, CCOOk eta LABek metaleko hitzarmena negoziatzeko aurkeztu duten aldarrikapen plataformari, eta, ondorioz, sindikatu horiek mobilizazioak deitzea erabaki dute.

ELAk babesa adierazi die, besteak beste, Tubacex, Petronor, PCB eta Metal Bizkaiako lan-gatazketan parte hartzeagatik inputatutako langileei. Laster epaitegietara iritsiko dira hainbat langileren aurka irekitako prozedura penal eta administratiboak, besteak beste, ELAn afiliatuta daudenen aurka, Tubacex, PCB, Bizkaiko Metal eta Petronorreko lan-gatazketan 2019 eta 2021 artean egindako mobilizazioetan parte hartzeagatik. ELAk uste du greba egitea edo manifestazio batean parte hartzea ezin dela delitu izan eta inputazio horien aurka protesta egingo duela.

Gasteizko Ugo-Equipos de Transmisión enpresako langile guztiek bat egin dute ostegun honetan, urtarrilaren 13an, lan baldintzen alde deitutako grebarekin. Era berean, zuzendaritzak jarrera aldatzen ez badu, urtarrilaren 20tik aurrera greba mugagabera joango direla aurreratu dute langileek.

ELAk Bizkaiko metalgintzako hitzarmenerako aldarrikapenak aurkeztu ditu gaur, urtarrilak 11, Negoziazio Mahaiaren bigarren bileran. Bertan, sindikatuak bere plataforma aurkeztu eta azaldu du, hau da, bere militantziarekin azken hilabeteetan egindako prozesu bateratu baten emaitza. ELAren helburua da sektorean sortzen den aberastasuna modu bidezkoan banatzea, prekaritatea ezabatzea, aurrerapausoak ematea eta Bizkaiko metalgintzan emakumeek jasaten duten diskriminazioaren aurkako neurriak ezartzea.

Europako grebarik luzeenak aurrera jarraitzen du, enpresako zuzendaritzak negoziatzeari uko egin diolako eta Lan Ikuskaritzak uko egin diolako enpresa jazartzeari eta zigor serioak jartzeari, grebalarien eskubideen aurka etengabe egindako urraketengatik.

ELAk urrats garrantzitsua egin du Arabako Metalean -1999tik hitzarmen kolektiborik gabe- negoziazioa bultzatzeko eta eduki onak bilduko dituen eraginkortasun orokorreko hitzarmen bat lortzeko. CCOO eta LABekin lortutako akordioari esker, ez da gutxiengoan akordiorik sinatuko, eta Arabako Metalaren Hitzarmen Kolektibo bat izango da helmuga; hiru sindikatuek ados egon beharko dute plataforma bateratua aktibatzeko edo mobilizazioak bultzatzeko; Arabako metalaren hitzarmena subsidiarioa izango da akordio propioa dutenentzat, eta horien edukia osatzeko edo hobetzeko balioko du.

ELA, LAB, ESK, STEILAS, HIRU eta EHNE sindikatuek elkarretaratzea egingo dute bihar, abenduak 21, eguerdiko 12: 30ean, Zumaiako Egurko enpresaren atarian, langile bat joan den larunbatean lan-istripuz hil dela salatzeko. 45 urteko gizona industria-nabe bateko teilatutik erori zen, garbiketa eta eraberritze lanak egiten ari zela.

Orioko Logística y Acabados SL enpresako langileak greba mugagabean daude abenduaren 13tik, enpresa-hitzarmena negoziatzeko. Besteak beste, soldata-igoerak eta urteko ordutegi-banaketan eta txanda-kontratuetan hobekuntzak eskatzen dituzte. Era berean, aldi baterako laneko enpresen prekarietatearen aurkako borroka nabarmendu nahi du ELAk; langileak ere greba mugagabean daude, pertsona horiek enpresak zuzenean kontrata ditzan.

Altan Bernedoko langileak – 150 pertsonako plantilla duen farmazia-enpresa – Greba mugagabean daude azaroaren 29az geroztik, KPIaren igoerak eta lanaldiaren blindatzea jasotzen dituen enpresa-hitzarmen baten defentsan. Beren egoera gizarteratzeko egiten ari diren mobilizazioen barruan, bihar, abenduak 17, manifestazioa egingo dute Gasteizko Andre Maria Zuriaren Plazan, 12:30ean.

ELAk salatu du LABek eta Errenteriako Okin taldeko Urkabe Benetan enpresak lortutako aurreakordioak ez dituela jasotzen batzordean adostutako eta batzarrean azaldutako oinarrizko aldarrikapenak. Horregatik, ez du akordioa onartzen eta aurka bozkatzeko eskatu die langileei. ELAk deitoratu egin du LABek aurreakordioa lortu izana, horrek ez dituelako aintzat hartzen batzorde-bileran adostutako eta batzarrean azaldutako oinarrizko eskaerak. Era berean, ez du ulertzen, enpresaren xantaien aurrean -Enpresak ziurtatzen zuen ez zuela negoziatuko mobilizazioak eteten ez baziren-, LAB langileak konbentzitzen saiatu izana adostutako mobilizazioekin bat egin ez zezaten.

Lehen greba eguna izan da Arabako zementuaren deribatuen sektorean eta jarraipen zabala izan du. Bigarrena bihar, abenduaren 17an, izango da. Sindikatu deitzaileek, alegia, ELA, UGT, CCOO eta LABek azpimarratu dute prekarizatua dagoen sektorearen lan baldintzak hobetzea dela helburua. Besteak beste, soldatak Arabako eraikuntzaren hitzarmenean jasotakoekin parekatzea eskatzen dute. Hala ere, patronalak soldata igoera txiki batzuk baino ez ditu egin nahi datozen urteetarako,-KPItik oso urrun- beraz, langileek erosteko ahalmena galduko lukete. Era berean, sektoreak bizi dituen beste arazo handi batzuk konpontzea eskatzen dute, hala nola behin-behinekotasuna edo gehiegizko lan kargak.

Abadiñon eta Zaldibarren, hurrenez hurren, dauden Industrias Alga eta Inervol lantegietako greba mugagabeari amaiera eman diote langileek. Abenduaren 9an hasi zuten greba, besteak beste, zuzendaritzak ez zielako zor zien jornala ordaintzen. Abenduaren 15ean, ordea, atzera egin, eta soldata itzuli die zuzendaritzak. Hori dela eta, greba bertan behera uztea erabaki dute.

AIRLANeko langileak zuzendaritzarekin akordio batera iritsi dira enpresako lehen hitzarmena lortzeko. ELAren ustez, akordio on baten aurrean gaude, eta langileak zoriondu ditu egindako borrokagatik. AIRLANek Alonsotegin du egoitza eta 48 langile ditu.

Zamudioko ZTE MMSSko Enpresa Batzordeak salaketa bat erregistratu du Lan Ikuskaritzan, eta greba-eskubidea oinarrizko eskubidea dela aldarrikatu du. Euskaltelen sarea instalatzeaz eta mantentzeaz arduratzen den ZTE MMSS enpresako langileek astebeteko greba hasi dute, 2018tik soldatak izoztuta dituztelako eta lan-baldintzak ezegonkorrak direlako. Abenduaren 15ean, langileek manifestazioa egin dute Euskaltelen egoitzaren aurrean, beren lan-egoera salatzeko.

Ortuellako (Bizkaia) Prest Zerbitzuak enpresako plantillaren zati bati ezarritako ERTEa inpugnatuko du ELAk. Erantzukizun sozialeko enplegu zentro berezia da, eta sindikatuak ziurtatu du Estatuko Enplegu Zerbitzu Publikoan (SEPE) ez dagoela Enplegu Erregulaziorako Espedienteari buruzko informaziorik. Hala ere, dagoeneko soldata jasotzeari utzi diote 32 langilek.

Alestis Aerospaceko 85 langile kaleratu zituztenetik urtebete igaro denean -abenduaren 1ean gertatu zen Enplegu-Erregulazioko Espedientea (EEE) Miñaoko (Gasteiz) Parke Teknologikoko lantegian-, enpresa batzordea Auzitegi Gorenaren epai judizialaren zain dago. Epaileak bihar, abenduak 15, bilduko dira. Auzitegi Nazionalak urtarrilaren 28an kontrako epaia eman ondoren aurkeztutako errekurtsoari emandako erantzuna izango da epai hori, eta garrantzia juridiko handia dauka enpresa batzordearen ustez, enpresa handietan (Aernnova, I.T.P. eta GESTAMP) aurkeztutako beste errekurtso batzuetarako irizpideak finkatu ditzakeelako eta jurisprudentzia sortu dezakeelako pandemian Enplegu-Erregulazioko Espedienteak aplikatu zituzten beste enpresetan ere.