ELAk ez du sinatuko Bizkaiko eraikuntza sektoreko aurre-akordioa

2018/03/15
Bizkaiko eraikuntzako ELAko ordezkarien batzarrak ezetza eman dio Ascobi-ren, CCOOren eta UGTren arteko aurre-akordioari. ELAren esanetan, soldata-igoera ez da nahikoa eta aurreko hitzarmenean sinatzaileek kendu zuten aurrera-eragina berreskuratzeko aukera galtzen da.

Joan den ostiralean Bizkaiko Eraikuntza sektoreko patronalak aurre-akordio bat sinatu zuen CCOO eta UGTrekin.

Egun horretan bertan ELAk egin zituen adierazpenetan argi utzi zuen aurre-akordioa urriegia zela eta ez zuela aplikazio-bermerik. Orain, sektore horretako ELA-ordezkariek, batzarrean bildurik, iritzi borobila eta aho batekoa eman dute aurre-akordioaren aurka, hurrengo arrazoi hauek emanez:

  • Negoziazioa mahaitik kanpo egin da. ELAk, sektoreko ordezkaritza osoaren %40 izan arren, ez du parte hartzerik izan negoziazioan.

  • Aurreko hitzarmenean itundu zituzten murrizketak ez dira kenduko.

  • Ez da jaso lan-erreformaren aurkako klausularik. Ez hitzarmena salbuestetik babestuko gaituen klausula, ezta aurreko hitzarmenean sinatzaileek kendu zuten aurrera-eragina berreskuratzeko klausula ere.

  • Soldata-igoera ez da nahikoa.

  • Hitzarmena betearazteko testurik ez da jaso. Eta hori da sektore honen benetako gaitza; izan ere, sektorean diharduten 16.000 soldatapeko langileetatik 3.500 langileri baino ez zaio aplikatzen hitzarmena.

ELAren iritziz, aukera paregabea galdu da aplikatzeko moduko hitzarmen on baten alde borrokatzeko.

Legezko arau bat, alegia, hitzarmena, ez betetzearen erruduna patronala. Pozarren egongo da orain soldata-igoerak plantilla bakar batzuei aplikatu behar dizkielako.

Sindikatu sinatzaileek, borroka alde batera uztean, hitzarmenaren aplikazioa noizbehinkako pasadizo bihurtu dute, sektorea susperraldian badago ere.