ELAk Gipuzkoako eraikuntzako mahai negoziatzailea osatzea eskatu du

2018/03/15
ELAk Gipuzkoako eraikuntzako mahai negoziatzailea osatzea eskatu du
Martxoaren 15ean Gipuzkoako Eraikuntza eta Obra Publikoen Hitzarmena negoziatzeko lehen bilera izan dugu PRECOn. ELAren eskariz egin da bilera, %60ko gehiengoa baitu sektorean (LABek %25’15, UGTk %9’27, eta CCOOek %5’96). Hala ere, mahaia eratu ezinik egon gara, bilerara joandako patronalek ordezkaritzaren inguruan izan duten eztabaida dela-eta. Beraz, martxoaren 23rako ezarri dugu hurrengo bilera.

 

Oraingo ekonomia-hazkundearen testuinguruan, bistan da bai obra publikoa, bai pribatua suspertu direla. Diru-kopuru handia inbertitzen ari da obretan, baina sektoreko langileen soldatak orain dela 10 urtekoak dira.

ELArentzat hitzarmena eta horren aplikazioa lehentasunezko gaiak dira; horregatik uste dugu hauxe dela abagunea Gipuzkoako oraingo Eraikuntza Hitzarmena berritzeko eta hobetzeko. Gogoan izan oraingo hitzarmenaren soldata-taulak 2009koak direla.

Alde horretatik eskatzen diogu patronalari arduraz jokatzeko, negoziazio-prozedura izapide formalengatik ez atzeratzeko, eta eztabaidagai nagusiari heltzeko. Izan ere, mahai gainean jarri behar dugun gaia sektoreko lan-baldintzak hobetzea eta bermatzea da, eta oraingo egoera ―esplotazioz, prekarietatez eta iruzurrez beteriko egoera― alde batera uztea.