Justiziak Novaltia zigortu du berriro, oraingoan, informazio-eskubidearen arloko askatasun sindikala urratzeagatik

2022/06/22
Euskal Autonomia Erkidegoko Justizia Auzitegi Nagusiak arrazoia eman dio ELAri, eta Novaltiak askatasun sindikalerako eskubidea urratu duela ebatzi du, sindikatuak 2021ean egindako greba bati buruz eskatu zion dokumentazioa ukatzeagatik. EAEko Justizia Auzitegi Nagusiak baietsi egin du sindikatuak jarritako demanda, eta enpresa kondenatu du ukatutako dokumentazio oso zabala ematera; baita sindikatuari 6.250 euroko kalte-ordaina ordaintzera ere, sindikatuaren informaziorako eskubidea urratzeagatik.

ELAk oso positibotzat jo du epai hori; alde batetik, enpresa-batzordeak eskuratu ahal izango duelako orain arte ukatu zaion dokumentazioa -grebarekin zerikusia duena-; bestetik, sindikatuak langileen interesak defendatzeko eta sustatzeko dituen informazio-eskubideak zabalduko direlako. Ebazpenak kontuan hartzen du, halaber, Lan Arloko Salak hainbat epai eman dituela Novaltiako grebari buruz, eta guztietan enpresa kondetatu dela greba-eskubidea urratzeagatik.

2021ean, greba-batzordeak grebarekin zerikusia zuen dokumentazio oso zabala eta garrantzitsua eskatu zion enpresari. Enpresak uko egin zion eta ELAk erabaki horren aurkako errekurtsoa aurkeztu zuen, baina lan-arloko epaitegiak ez zuen demanda baietsi. Hala ere, aste honetan Auzitegi Nagusiak onartu egin du ELAren helegitea, eta Novaltia zigortu du enpresa-batzordeari dokumentazio zabal bat ematera. Dokumentazio hori funtsezkotzat jotzen da, eta negoziazio kolektiboarekin eta enpresako grebarekin lotzen da.

Epaiak adierazten duenez, eskatutako dokumentazio ekonomikoa oso garrantzitsua da enpresaren benetako finantza-egoera ezagutzeko, langileek grebara eraman dituzten asmoak kontuan hartuta. Era berean, langile guztien ordainsarien berri eman beharko du enpresak, eskatutako baldintzetan; izan ere, ELAren aldarrikapenetako bat da, hain zuzen ere, soldata baxuenak igotzea, eta horrek Novaltiaren ordainsari guztiak ezagutzea eskatzen du.