Bizkaiko Arte Grafikoak

Patronala mahaitik altxatu da eta negoziatzen jarraitzeari uko egin dio

2025/11/04
Patronala mahaitik altxatu da eta negoziatzen jarraitzeari uko egin dio
Cebek patronalak bertan behera utzi du Bizkaiko Arte Grafikoen sektoreko Negoziazio Mahaiaren 32. bilera, eta aurreratu du ez direla berriro eseriko negoziatzera, sindikatuek hurengo bilera abenduaren 5erako proposatu bazuten ere. Negoziazioan parte hartu duten ELA, LAB, CCOO eta UGT sindikatuen ustez, jarrera hori "ez da serioa, eta erabat arduragabea da". Lau sindikatuek bilera formala eskatuko dute Cebekeko presidentearekin, Bizkaiko Arte Grafikoen patronalaren presidentea ere badena, gatazkari irtenbidea emateko.

Gaur, azaroak 4, Bizkaiko Arte Grafikoen sektoreko Negoziazio Mahaiaren 32. bilera egin da. Bertan ELA, LAB, CCOO eta UGT sindikatuek eta Cebek patronalak parte hartu dute. Hala ere, patronalak mahaia utzi du bilera amaitu baino lehen, eta negoziatzen jarraitzeari uko egin dio. Cebekek proposatu duen soldata igoerak 2012tik pilatutako erosahalmenaren galeraren erdia baino ez luke estaliko. Gainera, konpentsazio- eta xurgapen-klausula bat sartzea proposatu du, sektoreko enpresa askotan benetako igoerak eragotziko lituzkeena, eta, aldi berean, eskubide kontsolidatuak murriztu nahi dituena, hala nola txanda-kontratuarena.

Bileran, sindikatuek LGTBI kolektiboaren aldeko neurriei buruzko proposamenak aurkeztu dituzte, legeak hala eskatuta eduki horiek hitzarmen kolektiboetan txertatzeko. Hala ere, Cebek patronalak uko egin dio aldarrikapen horri ere, negoziazioa erabat blokeatuz. 

Egoera horren aurrean, azaroaren 18an beste mobilizazio bat deitu dute sindikatuek, sektoreko erreferentziazko enpresa baten aurrean, eta datozen hilabeteetan ekintza gehiago egingo dituzte, Cebek presionatzeko hitzarmen duin bat lortzeko.