TRANTSIZIO ENERGETIKOA
ELAk "Gure etorkizuna publikoa da. Demokrazia energetikoa” manifestua sinatu du
Inoiz baino argiago dago: energia enpresek, irabazi nahiak bultzatuta, eragina izan dute gobernuetan, nazioarteko erakundeetan eta Nazio Batuen ingurumen hitzarmenetan, kapitalaren metaketa eta zitalkeria bultzatzen duten erabaki politikoak hartzeko orduan. Hala, politika horiek ez diete lehentasuna ematen ingurumenari eta pertsonen beharrei. Pitzadura larriak eta sakonak daude merkatu ekonomiarekiko eta neoliberalismoarekiko fede itsuan, hamarkadetako pribatizazioa, erauzketa eta ustiapenean oinarritutakoan. Mundu osoko milaka milioi pertsonak aurre egin behar diote pobrezia energetikoari eta energiaren gehiegizko prezio historikoei. Une erabakigarria da hau justizian, elkartasunean eta demokrazian oinarritutako energia publikoko sistema baterako trantsizioa egiteko. Mundu osoan elkartzeko garaia da, pertsonen eta gure planetaren zainketa irabazien aurretik jartzeko.
Demokrazia Energetikoaren manifestua “Gure etorkizuna publikoa da” nazioarteko konferentziaren emaitza da. Bertan, ordezkari indigenek, sindikatuek, ekofeministek, justizia klimatikorako erakundeek, kolektibo solidarioek eta GKEek parte hartu zuten. Bertan, guztiontzako energia garbia eta eskuragarria bermatzeko bidea egin dezaketen neurriak zirriborratu ziren.
Adierazpen honen helburua energia eta ingurumen justiziarekin konprometitutako gizarte mugimenduak indartzea, zabaltzea eta bateratzea da. Kontakizun, estrategia eta ekintza komunak garatzeko prozesu politiko ireki eta jarraitu baten parte da.
Demokrazia energetikoaren alde borrokan ari diren taldeak gizarteko maila guztietan etorkizun hobea lortzeko konponbideen erresistentziaren lidergoa dute. Irabazietan oinarritutako energia ereduek areagotu egin dute krisi klimatikoa, ez dute lortu gure energia sistemak deskarbonizatzea, eta ez dute ematen energia garbi eta eskuragarria eskuratzeko aukera unibertsalik. Mundu mailan bat egin behar dugu, justizian, elkartasunean eta demokrazian oinarritutako energia sistema publikoetarako trantsizioa lortzeko.
Demokrazia energetikoaren aldeko mugimendu globalak onartzen du trantsizio energetikoa premiazko aukera bat dela gure sistema energetikoak merkatuari erreklamatzeko eta partaidetza, giza eskubideak eta berdintasuna erdigunean kokatzeko.
Energiak jabetza publikokoa eta kudeaketa demokratikokoa izan behar du, irabazi asmorik gabekoa. Energia horniduraren soluzioak kolektiboki adostu behar dira, oinarrizko komunitateekin, erabakiak hartzeko gunean.