Ez dugu Guggenheim nahi Urdaibain, Busturialdeak beste garapen eredu bat behar du

Entzute Prozesuan eskualdeko eta kanpoko edonork parte hartu dezake bere iritzia emateko. Eman izena urdaibai@agirrecenter.eus helbidean eta eman dezagun gure iritzia: Busturialdeak ez du Guggenheim behar eta arrazoi asko daude horrela pentsatzeko:

• Proiektua ez dute publikoki aurkeztu, ezta dagokion ingurumen inpaktu txostena ere.
• Proiektuak ez ditu eskualdearen beharrizanak asetzen: lehen sektorearen gainbehera, Gernikako ospitalea, garraiobide zaharkituak eta urriak, ura, saneamentua...
• Herritarrekin kontsultatu gabe inposatu nahi den proiektua. Prozesu parte-hartzaile barik. Era autoritarioan landua eta erabakia Entzute Prozesu batez zuritu nahi dena.
• %100ean diru publikoaz ordainduko den proiektua (130M€ hasteko) eta urteroko kanona, batek daki! (Bilbokoa 1,9M€ urteko).
• Saturatuta dagoen Estuarioa are gehiago saturatuko du. Hegaztien estresa ere handitzea dakar.
• Biosfera Erreserbaren eremu zaurgarrienean (nukleoa), 150.000 pertsona sartuko ditu.
• Etxebizitza garestitzea ekarriko du. Bizitza berria hasi nahi dutenen eskubidea mugatuta.
• Ostalaritza eta bizitza garestitzea. Lan prekarioen eskaintza gehitu eta espekulazioa sustatu.
• Aisialdiko eremuak eskariaren arabera pribatizatzea. Gaztelugatxe eredu argia
• Eskualdearen beharrei erantzun beharrean, museo pribatu baten beharrei erantzuten dio. Nork behar du nor? Eskualdeak museoa edo museoak gure paisaia zoragarria?
• Masa turismoan oinarritutako proiektua. Eskualdearen etorkizuna 3. sektorearen esku.
• Eskualdeko normatibak moldatuz bakarrik gauzatu daiteke. Proiektua bera moldatu beharko litzateke eskualdeko normatibetara. Herritar guztiok egiten dugun moduan.
• Kostaldeari buruzko legea urratzen da, eta alde batera uzten ari da itsas-lehorreko jabari publikoaren defentsa eta babesa. Balio ekologiko izugarria duen eremua babes gabe.
• Indarrean dauden babes-figura guztiek duten helburuen kontra doa: habitat eta espezien kontserbazioa. Turismo masiboa ez baita bateragarria kontserbazioarekin.
• Bertoko museo sarean, sortzaileen lanean eta kultura propioan inbertitzea alboratu eta museo eta kultura atzerritarrean inbertitzea bultzatzen du.
• Museoa egunero zabalik izateak ekonomikoki zer ekarriko duen baloratu da? Erakutsiko diren artelanak bertora garraiatzeak sortuko duen CO2 aztarna baloratu da?
• Klima aldaketak eragindako ezbehar ezagunak kontuan hartu beharrean, uholdeak izateko arrisku handieneko eremuak aukeratu dira museoak eraikitzeko. Interes ekonomikoak herritarrok babestearen aurretik jarrita.
• Hainbat dira proiektuak eragingo dituen arazoak: Habitataren degradazioa, kutsadura, faunaren gaineko eragina, lurzoruaren higadura, baliabide naturalen gaineko presioa, tokiko kultura zapaltzea, kudeaketa-arazoak eta karga-ahalmen gainditua.

Parte har dezagun denok Entzute Prozesuan eta entzun dezatela ez dugula Guggenheim behar!