Madrildik zerura (Astekaria 249. Editoriala)

2008/07/04
Besteak beste etor zitezkeen hauteskunde deialdietan aurkezteko aukerarik izan ez zezan bidezkoa den esparru sozial eta politiko baten jarduera politikoa etetea erabaki zuen Garzon epaile ezagunak. Tenore honetako erabakia izan da bost urtetako zigor politikora kondenatu eta makina jenderen borondatea klandestinitatera behartu duena. Espresuki EHAK eta EAE alderdien jarduera etetea erabaki zuen ditxosozko epaileak. Bere bulegoan gai potolo asko izanik, badaezpadako erabaki honek zentzuzkoa iruditu zitzaion behin betiko erabakia sortu bitartean inongo kalterik eragin ez zezaten alderdi hauek.

Euskal Herriak bere gordintasunean bizi duen gatazka politikoaren ondorioak bere haragitan larrutik ordaindu duten pertsonak ere –mehatxuak, bortizkeria, bahiketak...– epaile berak susmopean  jarri ditu berriki, kaltetuak izatetik gaizkiletzat hartuak izan artera. Kaltetua, beraz, bi aldiz kaltetua. Bestelakoa beharko luke bere jarrera, bereziki kontutan hartu izan balu borondatez  epaitegira deklaratzera zihoazen hamar bat gazteren eskubideak urratu izan zirela, kasu. Atxiloketa, inkomunikazioa, galdeketak... Horretan ordea isilik, arnas arrastorik eman gabe.

Hainbeste gai eta auzitan aditua den epaileak ederki asko prestatu dio bidea Auzitegi Gorenak hartu beharreko behin betiko erabakiari. Epaiketa honetan Auzitegi Gorenaren aurrean Madrilen deklaratzera deitutako borondate oneko lekukoek garbi asko ikusi ahal izan zuten noraino iristen den Garzonen izpirituaren beso luzea. Deklarazio aurretik epaia guztiz idatzia edo erabakia dagoela uste osoa dago. Honek ez du, orain arteko  epaitegien ibilbideari erreparatuz, ezusteko handiegirik suposatzen.

Dena den, argi ibil gaitezke. Auzitegi Gorenean epaitegi-gela nagusira deklaratzera sartu aurretik hiruzpalau ordu zain  bagauzkate ere, pasabideko alfonbra zapaltzeko debekua izanen duzu, segurtasuneko zaintzaileak hala agindurik. Zangoen asperdura eta nekeak ibiltzera behartzen bazaitu ere, hantxe dago gorrotoaren alfonbra muga. Edonon senti dezakezu. Eta denon buruan, hauen Madrildik zerura ala infernura?