Aurten Hego Euskal Herrian 37 langile hil dira
Lehenengo eta behin, ELAk bere sostengua eta elkartasuna agertzen dizkie biktimaren ahaideei eta lankideei; eta aldi berean gertaerak berehala ikertzea eskatzen du, istripuaren zergatiak eta erantzukizunak argitzearren.
Salatu ohi dugunez, enpresetan eta lantokietan dagoen prekarietate handia izaten da lan-istripu gehienen azken arrazoia, eta oraingo honetan ere beste horrenbeste esan dezakegu. ELAk azken urteotan enpresa horretako prebentzio-neurririk eza salatu du, aurreko urteetan ere langileek istripuak izan dituzte-eta.
ELAren ustez istripuak lan-baldintzak prekarizatzearen ondorioetako bat da. Enpresen diru-interesak lehenesten dira, langileen osasunaren aurretik; eta, horrekin batera, administrazio publikoak, bere aldetik, ez du garatzen prebentzio-politika benetakorik edo eraginkorrik, eta gainera indarrean dagoen prebentzio-arauak betearazten ere ez da behar bezala arduratzen.
Azkenik, ELAk berresten du bere konpromisoa lan-prekarietatea errotik ezabatzeko, horixe baita langileen istripu-tasa handiaren jatorria. Horretarako, ELAk bat egiten du Enpresa Batzordearen deiarekin protesta-elkarretaratze bat egiteko, datorren astelehenean, uztailak 10, goizeko 11:00etan, enpresaren aurrean.