LAH HERIOTZA

ELAk elkarretaratzea egin du Tuteran, martxoaren 17ko lan heriotza salatzeko

2025/03/20
ELAk elkarretaratze egin du Tuterako Plaza Berrian (Nafarroa), martxoaren 17an gertatutako lan heriotza salatzeko. Sindikatuak lortutako informazioaren arabera, makina batek 34 urteko langilea harrapatu zuen eta ezbeharrak eragindako zaurien ondorioz hil zen. Dagoeneko 11 langile hil dira aurten Nafarroan lan-istripuz. Hau da, astero pertsona bat hiltzen da bere lanpostuan edo lanpostura bidean.

ELAk gogorarazi du Nafarroak Estatuko lan hilkortasun tasarik altuena duela, enpresen zigorgabetasunaren eta erakunde publikoen konplizitatearen ondorioz. Datu ofizialek berresten dute prebentzioa ez dela egiten edo paperean geratzen dela. Bitartean, Nafarroako Gobernuak uko egiten dio laneko segurtasun neurriak ez betetzearen aurrean kontrol neurriak hartzeari, eta patronalak absentismoari buruzko diskurtso faltsua elikatzen jarraitzen du.

Laneko heriotzak saihestu egin daitezke, baldin eta enpresek prebentzioaren arloan beharrezkoak eta nahitaezkoak diren neurri guztiak hartzen badituzte eta Nafarroako Gobernuak bere eginkizuna betetzen badu: enpresei neurriak betearaztea. ELAk salatu du Nafarroako Gobernua konplize dela enpresen ez betetzeetan, eta, beraz, laneko ezbeharren erantzule dela.

Beharrezkoa da Nafarroako Gobernuak Lan Ikuskaritzako plantilla indartzea, Europako batez bestekoaren ratioarekin berdintzeko, eta enpresek Lan Arriskuen Prebentzioaren arloko araudi osoa betetzen dutela bermatu ahal izateko.