ELAk Loiuko Sisteinge enpresan beste lan-istripu bat gertatu dela salatu du

2020/09/28
Sisteinge enpresako 34 urteko langile bat hil zen joan den irailaren 26an Kantabriako Derivados del Fluor enpresan izandako leherketa baten ondorioz. ELAk babesa adierazi nahi die hildakoaren senide eta lagunei, eta istripuaren arrazoiak argitzeko ikerketa eskatu du.

Urte honetan, gutxienez 45 dira Hego Euskal Herrian lan-istripuz hildako langileak, eta horiei COVID-19 pandemiaren ondorioz hildako langileak gehitu behar zaizkie. "Laneko istripuei buruzko estatistikak beti dira onartezinak, baina aurten are onartezinagoak dira. Urteko hirugarren hiruhilekoan gaude oraindik, eta iazko istripu-tasara iritsi gara. Zifra beldurgarriak dira, koronabirusaren ondorioz lan-jardueran izan dugun geldialdia kontuan hartuta", salatu du ELAk.

Gehitu duenez, beharrezkoa da, inoiz baino gehiago, enpresen arriskuen prebentzioari buruzko araudia betearazteko baliabide ekonomikoak eta giza baliabideak dituzten gobernuen eta erakundeen inplikazioa. Sindikatuak argi dio istripuak lan-prekaritatea areagotzen duten egiturazko arrazoi ezagunengatik gertatzen direla, kasu zehatz honetan azpikontratazioa bezala. Prebentziorik ez badago, langileek hiltzen eta gaixotzen jarraituko dute, enpresa-onura handiagoen kontura.

Testuinguru honetan, asteazkenean, irailaren 30ean, euskal gehiengo sindikalak elkarretaratzea egingo du Sondikan (Bizkaia), Berreteaga Bidean dagoen industrialdearen sarreran, heriotzaren aurka protesta egiteko.

Bizitza lanaren aurretik jartzea, osasuna produkzioari gailentzea eta laneko gaixotasun eta istripu berriak saihesteko beharrezko prebentzio-neurri guztiak jartzea exijitzen du ELAk.