FREMAP

ELAk salatu du Fremap enpresak tratu iraingarria eta diskriminatzailea eman diola lan-istripuan zauritutako langile etorkin bati

2024/06/10
50 pertsona inguru Fremap mutualitatearen Bilboko egoitzaren aurrean mobilizatu dira justizia eskatzeko Mohammed Hatit marokoar jatorriko 33 urteko langileari. Langile horrek istripu larria izan zuen Getxoko obra batzuetan (Construcciones Loizagaren azpikontrata) lanean ari zela. Gaur, bajan jarraitzen du, gurpildun aulkian, eta osasun-laguntza eskatzen dio Fremapi.

2022an Mohamed Htitek istripua izan zuenetik, Fremapetik jasotako tratua negargarria eta diskriminatzailea izan da. Istripua arintzat jo zen, nahiz eta urtebete egon ospitalean. Gainera, 365 baja-egun bete baino egun gutxi batzuk lehenago, mutualitateak alta medikoa eman zion. Ospitale-alta ematean, eta inolako arrazoirik gabe, mutuak Ertzaintzari deitu zion mutualitatetik irtetera laguntzeko.

Fremapek ez du Mohamed Htiten patologia tratatu nahi, nahiz eta nerbio-sistema kaltetua izan lan-istripuaren ondorioz; hainbat txosten medikok egiaztatzen duten bezala.

ELAren ustez, Fremapen tratua iraingarria, arrazista eta diskriminatzailea da. Mohammedek bi aldiz sufritu du, alde batetik 33 urterekin gurpil-aulki batean dagoelako lan-istripu baten ondorioz eta, bestetik, Fremapen diskriminazioa eta arrazismo instituzionalagatik. Langilearen jatorria bestelakoa balitz, ziur aski ez zen hori guztia gertatuko.

ELA auzitegietan ari da kasua aurrera eramaten, Bidelagun Fundazioaren bitartez, zoritxarrez salbuespena ez den kasu batean justizia egiten saiatzeko. ELAk Mohammedentzako arreta espezializatua eskatu dio Prestazio Berezien Batzordeari, hala nola errehabilitazio-zerbitzua, laguntza psikologikoa, etxez etxeko laguntza eta, azkenik, egoera berrira egokitutako etxebizitza bat alokatzeko laguntza.