Sindikatuek eskatu dute baztertu dadila gaixotasun traumatologikoak mutuen bidez kudeatzea

ELA, ESK, STEILAS, USO, CGT, CNT eta OPAk elkarretaratzea egin dute Mutualiaren egoitzaren aurrean, Bilbon, Eusko Jaurlaritzari eta Nafarroako Gobernuari eskatzeko ez dezatela onartu gaixotasun traumatologikoak mutuek kudeatzea. Besteak beste, sinadurak bildu dituzte horretarako. Dagoeneko 80 enpresa inguruk sinatu dituzte mozio hauek eta datozen egunetan lan horrekin jarraituko dute.

2023an, CCOO eta UGT sindikatuek eta CEOE eta CEPYME patronalek proposatu zuten langileen gaixotasun arruntak osasun sistema publikoan kudeatu ordez, zuzenean mutuek kudeatzea, gaitz traumatologikoetatik hasita. Bada, Autonomia erkidego bakoitzak erabaki beharko du mutualitateekin lankidetza hori adosten duen ala ez, baina sinatuz gero, ondorio larriak izango lituzke, hala nola osasun sistema publikoaren pribatizazioa, mutuen eskumenak handitzea edo langile klasearen osasunaren kudeaketan gabezia handiagoak izatea.