Beste heriotzezko lan-istripua Getarian

2021/05/06
ELAk jakin duenez, Getariako Indaux enpresako langile bat zendu da gaurko egunez asteburuan izandako zoritxarrezko lan-istripuak eragindako zaurien ondorioz. Heriotza berri honekin, dagoeneko 22 lirateke aurten Hego Euskal Herrian lan-istripu baten eraginez bizitza galdu duten pertsonak, hirugarrena Gipuzkoan.

Hildakoaren senitarteko eta lagunei elkartasun eta babes zintzoena adierazi nahiko genieke lehenik eta behin, baita heriotzazko lan-istripua izan duen langilearen lankideei ere. Une latz hauetan ez dago hitzik sentituko duten samina leuntzeko.

2020.urtean 70 izan ziren lan-istripuetan zendutako langileak eta aurten lakra hau hartzen ari den abiadurak sekulako bertigoa ematen du. Egoeraren larritasuna ikusirik, urtero 50etik gora lagunen bizitza aurretik eramaten duen bidegabekeria honekin amaitzeko garaia da. Borondate politikoa eta enpresarien behin-betiko konpromezua besterik ez dira behar lakra honekin amaitzeko.

Horregatik guztiagatik, Indauxeko Enpresa Batzordeak deituta, kontzentrazio bana egingo dira bihar, maiatzak 7, eguerdiko 12: 00etan, Getariako pilotalekuan, batetik, eta Aiako Indaux enpresaren aurreko biribilgunean, bestetik.