Lan heriotza Eibarren, urteko hamalaugarrena

2022/03/29
ELAk jakin duenez, martxoren 28an eraikuntzako 60 urteko behargin bat zendu zen lan-istripu baten ondorioz. Behargina Azitain auzoko industria gunean ari zen uralitazko teilatu baten berritze lanetan. Ikertzeke dauden arrazoiak medio bost metroko altueratik erori zen. Heriotza berri honekin, dagoeneko gutxienez 14 lirateke Euskal Herrian lanean bizitza galdu duten pertsonak, bosgarrena Gipuzkoan.

2022 urtean altueratik erorita hiltzen den bosgarren langileari buruz ari gara. Oso larria da eraikuntza sektoreak bizi duen legediaren betetze mailaren kontrol eza, bai administrazioaren partetik eta baita patronalaren partetik ere. Sektoreko enpresek langileen ongizatea eta segurtasuna bermatu ordez, produktibitatea gailentzen dute eta horrek, zoritxarrez, prekarietatearen hazkunde esponentziala dakar; datuei erreparatzea besterik ez dago hau horrela dela konturatzeko.

Egoeraren larritasuna ikusirik, prebentzio legediaren betegabetzeen kontrol eta jarraipen neurriak berehalakoan ezarri ditzala exigitzen dio ELAk Eusko Jaurlaritzari, lantokietan antolatu eta urtean 50etik gora lagunen bizitza aurretik eramaten duen bidegabekeriaren aurka borrokatzeko deia luzatzen duen aldi berean. Borondate politikoa eta enpresarien behin-betiko konpromisoa besterik ez dira behar lakra honekin amaitzeko, irabazi gosearen gainetik langileen osasuna eta segurtasuna jarriz.