Langile bat hil da lan istripuan Lakuntzan

2019/06/25
ELAk jakin ahal izan duenez, 35 urteko langile bat hil da Mecanizados Lakber enpresan, Lakuntzan, fresatzeko makina batek harrapatuta. Sakanako Kooperatibaren parte den enpresa horretan hiru langile hil dira honez gero 2015etik hona. Bestalde, ABLE bateko langile bat helikoperoz artatu behar izan dute Leitzako Sarriopapel enpresan harrapatuta geratu eta zauritua suertatu ondoren. Enpresa horretan ere sarritan gertatzen dira horrelako istripuak.

Lehenik eta behin, ELAk bere babes eta elkartasun osoa adierazi nahi die biktimei, senitarteko eta hurbilekoei, aurten dagoeneko Nafarroan 6 eta Euskal Herrian gutxienez 24 heriotz eragin dituen drama sozial honen aurrean.

Era berean, gogor salatzen du etekin ekonomikoak langileriaren osasun eta bizi baldintzen aurretik lehenesten dituen enpresa-politika kriminala. Inbertsio falta eta laneko ezbeharrak ezkutatzeaz gain, patronalak erreforma laboralek oparitutako tresnak baliatzen ditu langileen segurtasunaren lepotik lan-baldintzak okertzen jarraitzeko. Hau dela eta, 2012tik etenik ez daukan igoera ematen ari da lan-ezbeharren estatistiketan.

Bestalde, ELAren iritziz Nafarroako Gobernuaren lan-osasun politikak guztiz onartezinak dira. Orokortuak diren ez-betetzeak dauzkagun honetan, eta administrazioaren teknikari nahiz ikuskatzaile kopurua Europar Batasunekoaren erdia baino ez delarik, Ayerdi eta Goñiren Nafarroako Lan Sailak UPNren elkar-hartze eredua elikatzera bideratzen ditu baliabide publikoak, Lurraldeko Prebentzio Ordezkarien bitartez.

Azkenik, ELAk lan-ezbeharrak lantoki eta enpresetatik desagertarazteko antolatzera deitzen du Nafar langileria, Euskal Herriko gehiengo sindikalak datozen egunetan deituko dituen mobilizazioetan parte hartzeko deia luzatzen dion aldi berean.